Xonanda Dilso‘z tug‘uruqxonada dard turib yotgan holatini suratga tushirib, Telegram orqali tarqatib yuborgan tibbiy xodimlarni sudga berdi, deya xabar qiladi “Sayyod.com”.
“Jinoiy ish qo‘zg‘atish uchun ariza yozib berdim. San’atkorlarni bunaqa holatda suratga tushirib tarqatishlari birinchi marotaba emas ekan. Masalan, Xosiyat opani ham tug‘uruqxonadagi shu kabi suratlarini chiqarib yuborishgan ekan. Bu narsani cheklash kerak-ku, yaxshi inson bo‘lsa, unaqa paytda rasmga olmasligi kerak edi. Bu yaxshi ish emas”, — dedi Dilso‘z.
Xonanda, shuningdek, “farzandi erta tug‘ilib qolibdi”, deb boshqa narsaga shama qilayotganlarga javoban, qizi yetti oylik bo‘lib tug‘ilganini, to‘ylari rasman e’lon qilinishidan oldinroq bo‘lib o‘tganini ta’kidladi. To‘yni namoyishkorona e’lon qilish oilaviy sharoitlar tufayli keyinroqqa qolib ketgan. “Bu shaxsiy bo‘lgani uchun har bitta odamga tushuntirishim shart emasdi, bunga imkon ham yo‘q. Hammaning o‘z hayoti bor-ku”, — dedi Dilso‘z.
18-oktabr kuni, Toshkent vaqti bilan soat 15:40 larda Toshkentdagi 6-tug‘uruqxonada Dilso‘z taxallusi bilan ijod qiladigan xonanda Go‘zal Jumaniyozova-Raimova va uning turmush o‘rtog‘i “Mango” guruhining sobiq a’zosi Farrux Raimov qiz farzandlik bo‘lgandi.
Qizaloqqa Dilso‘z o‘z taxallusini ism tariqasida qo‘yishga qaror qilgan va unga Dilso‘z ismini bergan.
Eslatib o‘tamiz, xonandalar Dilso‘z va Farrux Raimov joriy yilning aprel oyida turmush qurgan edi. Ularning nikoh to‘yi 15-aprelda Navoiyda va 21-aprelda Toshkentda bo‘lib o‘tgan edi.
Izoh (0)