Yevropa futbol uyushmalari ittifoqi (UEFA) prezidenti Mishel Platini o‘zi rahbarlik qilayotgan tashkilot ijroiya qo‘mitasining bo‘lajak majlisida qatnashadigan bo‘lsa, Xalqaro futbol federatsiyasi (FIFA)ning etika bo‘yicha qo‘mitasi unga qarshi yangi ish ochadi. Bu haqda “TASS” xabar bermoqda.
UEFA 15-oktabr kuni Non shahridagi o‘z qarorgohida tashkilotga a’zo barcha 54 mamlakat vakillari ishtirokida favqulodda majlis o‘tkazadi. Favqulodda majlis Platini, FIFA prezidenti Yozef Blatter, shuningdek, FIFA bosh kotibi Jerom Valkening lavozimidan va futbol bilan bog‘liq faoliyatdan 90 kunga chetlatilgani bilan bog‘liq. Bundan tashqari, shu kuni UEFA ijroiya qo‘mitasining favqulodda majlisi ham bo‘ladi.
“Chetlatish futbol bilan bog‘liq faoliyat bilan shug‘ullanishni, xususan, UEFA majlislarida qatnashishni taqiqlaydi. Aks holda, bu etika kodeksining buzilishi deb hisoblanadi va qo‘shimcha tergovga sabab bo‘ladi, bunda mazkur qoidabuzarlikning yuz berishiga ko‘mak bergan boshqa futbol amaldorlari ham tergov qilinadi”, — dedi FIFAning etika bo‘yicha qo‘mitasi tergov palatasi matbuot kotibi.
Eslatib o‘tamiz, FIFAning etika bo‘yicha qo‘mitasi Platinining chetlatilganini 8-oktabr kuni e’lon qildi. Qaror avvalroq o‘tkazilgan tergov ma’lumotlari asosid qabul qilingan. Platini ham, u bilan birga chetlatilgan Blatter ham mazkur qaror ustidan FIFA apellyatsiya qo‘mitasiga shikoyat qilgan.
Izoh (0)