Buyuk Britaniya rasmiylari mamlakat Yevropa Ittifoqi tarkibida qolish shartlarini ma’lum qildi. Bu haqda “The Telegraph” ma’lumotlariga tayanib, “Exo Moskvi” xabar berdi.
Bosh vazir Devid Kemeron mahkamasi bu shartlarni to‘rtta bandga jamlagan. Birinchidan, Bryusell Birlashgan qirollikni Yevropada superdavlat qurishga tortmasligi lozim. Ikkinchidan, YeI rahbariyati yevro hamjamiyatning yagona valyutasi emasligini rasman tan olishi kerak. Uchinchidan, Buyuk Britaniyaga YeI qabul qilayotgan qonunlarni inkor qilish va mavjud huquqiy me’yorlarni bekor etish imkoniyati berilishi zarur. To‘rtinchidan, yevro milliy valyuta bo‘lmagan 9 mamlakat Ittifoqdagi qolgan 19 ta davlat ustunligidan himoya qilinishi lozim.
London mazkur shartlar maqbul variant ekanligi va Bryussel bilan o‘zaro murosaga kelish mumkinligiga ishonmoqda. Oldinroq bosh vazir Devid Kemeron mamlakat Ittifoq tarkibida qolishini istayotganligi haqida xabar berilgan edi.
Eslatib o‘tamiz, Buyuk Britaniya YeIda a’zolik yuzasidan 2017-yil oxirida umummilliy referendum o‘tkazishni ham rejalashtirgan.
Izoh (0)