Xalqaro futbol federatsiyasi (FIFA) prezidenti Yozef Blatter, Yevropa futbol assotsiatsiyalari ittifoqi (UEFA) rahbari va FIFA vitse-prezidenti Mishel Platini va FIFA bosh kotibi Jerom Valke 90 kunga futbol bilan bog‘liq har qanday faoliyatdan chetlatildi. Bu qaror, “TASS” xabariga ko‘ra, FIFAning etika bo‘yicha qo‘mitasi tomonidan qabul qilingan.
Xabar berishlaricha, muddat yana uzaytirilishi mumkin, biroq uzaytiriladigan muddat 45 kundan oshmaydi. Qaror qabul qilingan vaqtdan boshlab kuchga kirgan. Mazkur qaror FIFAning etika bo‘yicha qo‘mitasi tergov palatasi tomonidan olib borilayotgan surishtiruv harakatlari doirasida qabul qilingan. Blatterga nisbatan surishtiruv ishlarini Robert Torres, Platini bo‘yicha esa Vanessa Allard olib bormoqda.
Ayni vaqtda, FIFA matbuot xizmatining ma’lum qilishicha, Blatterga istalgan ko‘rinishda tashkilot nomidan harakat qilish yoki FIFA vakili sifatida OAV bilan muloqot qilish taqiqlangan. Shuningdek, FIFA tashkilotning sobiq vitse-prezidenti, janubiy koreyalik Chxon Mon Junni olti yilga diskvalifikatsiya qilish haqida qaror qabul qildi.
Shuningdek, Mon Jun 100 ming Shveysariya franki miqdorida jarimaga ham tortildi. Etika bo‘yicha qo‘mitaning mazkur qarori ham qabul qilingan vaqtidan boshlab kuchga kiradi. Janubiy koreyalik diskvalifikatsiya muddati davomida milliy miqyosda ham, xalqaro darajada ham futbol bilan bog‘liq hech qanday faoliyat bilan shug‘ullana olmaydi.
Izoh (0)