Euronews O‘zbekistonning tarixiy shaharlari haqidagi ko‘rsatuvlarni suratga olishga tayyorgarlik ko‘rmoqda

5—14-oktabr kunlari Euronews telekanalining suratga olish guruhi Uzbekistan Life ko‘rsatuvi uchun O‘zbekistonning tarixiy shaharlari – Samarqand, Buxoro va Termiz haqida uchta ko‘rsatuv tayyorlash maqsadida O‘zbekistonda bo‘ladi. Bu haqda “Jahon” xabar beradi.

Suratga olish guruhi tarkibida muxbir Katarina Kaun va operator Fabian Velter tashrif buyuradi. O‘zbekiston haqidagi ko‘rsatuv dunyoning 155 ta davlatidagi 370 milliondan ortiq tomoshabinlar auditoriyasiga ega Euronews telekanalining 13 ta tilida namoyish etiladi.

Ushbu media loyiha “O‘zbekturizm” Milliy kompaniyasi va Euronews telekanali o‘rtasida O‘zbekistonning boy tarixiy merosini dunyoga tanitish maqsadida yo‘lga qo‘yilgan hamkorlik doirasida amalga oshirilmoqda.

Eslatib o‘tamiz, Euronews telekanalida sentabr oyidan boshlab Samarqand, Buxoro va Xiva tarixiy yodgorliklari aks etgan 30 soniyalik reklama roligi namoyish etila boshlandi.  Le Mag ruknida esa Samarqandda bo‘lib o‘tgan “Sharq taronalari” xalqaro festivali haqidagi reportaj uzatildi.