Toshkentdagi “O‘zbekiston” sport saroyida dzyudo kurashi bo‘yicha Gran-Pri turkumiga kiruvchi yirik xalqaro turnir yakunlandi. Mazkur nufuzli musobaqada dunyoning 52 davlatidan 355 nafar sportchi jami 14 ta vazn toifasida sovrinli o‘rinlar uchun kurash olib bordi, deb xabar beradi “Olamsport”.
Yakunda O‘zbekiston terma jamoasi dzyudochilari 1 ta oltin, 1 ta kumush, 4 ta bronza medali bilan umumjamoa hisobida uchinchi o‘rinni egalladi. O‘zbekistonga yagona oltin medalni -73 kg vazn toifasida tatamiga chiqqan Mirali Sharipov keltirdi. Ushbu vazn toifasida ishtirok etgan O‘zbekistonning yana bir vakili G‘iyosjon Boboyev esa bronza medaliga sazovor bo‘ldi. Musobaqaning so‘nggi uchinchi kungi bahslarida -90 kg vazn toifasida Sherali Jo‘rayev bronza medali bilan taqdirlandi. -100 kg vazn toifasida tatamiga chiqqan Soyibjon Qurbonov ham bronza medaliga sazovor bo‘ldi.
Toshkent Gran-Prisida 4 ta oltin medalni qo‘lga kiritgan dzyudo vatani hisoblangan Yaponiya terma jamoasi umumjamoa hisobida birinchi bo‘ldi. Uchta oltin, bitta kumush medalni o‘z hisobiga yozib qo‘ygan Janubiy Koreya terma jamoasi ikkinchi o‘rinni egalladi. Germaniya, Mo‘g‘uliston, Buyuk Britaniya, Italiya, BAA va Turkmaniston terma jamoalari uyga bittadan oltin medal bilan qaytdi.
Eslatib o‘tamiz, Toshkent Gran-Prisining mukofot jamg‘armasi 100 000 AQSh dollarini tashkil qildi. Ushbu Gran-Pri musobaqasida 2016-yili Rio-de-Janeyro shahrida o‘tkaziladigan XXXI yozgi Olimpiya o‘yinlarining yo‘llanmalari uchun reyting ochkolar ham o‘ynaldi. Musobaqada oltin medalga sazovor bo‘lgan sportchilar 300 reyting ochkosiga, ikkinchi o‘rin sohiblari 180, bronza medali sovrindorlari esa 120 reyting ochkosiga ega bo‘ldi.
Izoh (0)