77 kishini o‘ldirgani uchun 21 yilga ozodlikdan mahrum etilgan norvegiyalik terrorchi Anders Breyvik “o‘lguniga qadar davom etadigan” ochlik e’lon qildi. Bu haqda “Segodnya.ua” xabar bermoqda.
U mazkur qarorni qamoqxonadagi sharoitlar yomonlashgani sabab qabul qilgan. Breyvikning fikricha, 2-sentabrdan boshlab qamoqxonada saqlashning yangi qoidalari amal qilishni boshlaganidan so‘ng, unga “noinsoniy munosabat”da bo‘lishmoqda.
Yangi qoidalarga muvofiq, Breyvik ikki xonali kameradan bir xonali kameraga ko‘chirilgan va sutkaning 23 soati davomida kameradan tashqariga chiqishi mumkin emas. “Men o‘lgunimga qadar ochlik e’lon qilaman. Bu yerdagi sharoitlarga ortiq chiday olmayman”, — dedi Breyvik.
Breyvikning advokati so‘zlariga ko‘ra, terrorchini saqlash sharoitlari “u yoki bu ma’noda” yomonlashgan: uning boshqa mahbuslar bilan muloqot cheklangan, u erkin harakatlanishi mumkin bo‘lgan hudud qisqartirilgan, boshqa mahbuslar bilan birga bo‘lish vaqti kamaytirilgan.
Anders Breyvik 2011-yili Oslo markazida amalga oshirilgan va 77 kishining o‘limiga sabab bo‘lgan terrorchilik harakati tashkilotchisi hisoblanadi. 2012-yili u 21 yilga ozodlikdan mahrum etilgan, ayni vaqtda uning jazo muddati cheklanmagan miqdorda uzaytirilishi mumkin.
Izoh (0)