Temur Olimxo‘jayev boshchiligidagi O‘zbekiston o‘smirlar terma jamoasi Osiyo chempionati—2016 saralash bosqichi doirasidagi uchinchi o‘yinda ham yirik hisobda g‘alaba qozondi. Bu haqda O‘zbekiston futbol federatsiyasi matbuot xizmati xabar bermoqda.
Falastinning ar-Ram shahrida joylashgan “Faysal al-Husayn” stadionida Yaman o‘smirlar terma jamoasiga qarshi bo‘lib o‘tgan uchrashuvda bu safar O‘zbekiston U-16 terma jamoasi raqib darvozasiga beshta gol kiritdi.
Har ikki jamoa ham o‘tkazilgan avvalgi ikki o‘yinda g‘alaba qozongan va 6 tadan ochkoga ega bo‘lib turgandi. Har ikkisida ham guruhdan birinchi o‘rin bilan, Osiyo chempionatiga yo‘l olish imkoniyati bor edi. Shu sababli o‘yinning dastlabki choragi ehtiyotkorlik bilan o‘tdi.
Birinchi bo‘lim 3:1 hisobida O‘zbekistonning g‘alabasi bilan yakunlandi. Uchrashuvning ikkinchi bo‘limida Rasul Yo‘ldoshev yana ikki bor raqib darvozasini aniq nishonga oldi. Bu uning ushbu saralash bosqichidagi ikkinchi xet-trigi bo‘ldi. Birinchi o‘yinda olgan jarohati tufayli Falastin bilan o‘yinda maydonga tusha olmagan Yo‘ldoshev ikki o‘yinda 6 ta gol kiritishga muvaffaq bo‘ldi.
Uchrashuvga qo‘shib berilgan daqiqalar o‘tib borayotgan bir paytda Yaman hisobdagi farqni biroz qisqartirdi – 5:2.
O‘zbekiston o‘smirlar terma jamoasi Osiyo chempionati saralashidagi barcha o‘yinlarda yirik hisobda raqiblarini mag‘lub etdi. Dastlabki o‘yinda Maldiv orollari jamoasi darvozasiga javobsiz 8 ta gol kiritgan bo‘lsa, ikkinchi o‘yinda Falastinni 6:0 hisobida mag‘lub etgan edi.
O‘zbekiston U-16 “A” guruhi g‘olibi sifatida 2016-yilning 15-sentabridan 2-oktabrigacha Hindistonda o‘tkaziladigan Osiyo chempionati final bosqichiga yo‘llanmani qo‘lga kiritdi.
Izoh (0)