O‘n olti yoshgacha bo‘lgan futbolchilar o‘rtasidagi Osiyo chempionati saralash bosqichi doirasida O‘zbekiston o‘smirlar terma jamoasi o‘zining dastlabki uchrashuvini o‘tkazdi, deb xabar beradi O‘zbekiston futbol federatsiyasi matbuot xizmati.
Saralash bosqichini “A” guruhida o‘tkazayotgan Temur Olimxo‘jayev jamoasi Falastinning Ar-Ram shahridagi “Faysal al-Husayni” stadionida Maldiv orollariga qarshi maydonga chiqdi.
O‘yinning dastlabki bo‘limida O‘zbekiston U-16 ko‘plab vaziyatlar yaratganiga qaramay, faqatgina birgina gol bilan kifoyalandi. Ikkinchi taymda esa o‘zbekistonliklar yettita to‘p kiritdi.
Guruhdagi ikkinchi o‘yinda Yaman o‘smirlar terma jamoasi Falastinni 2:0 hisobida mag‘lub etdi.
Birinchi turdan so‘ng O‘zbekiston o‘smirlar terma jamoasi “A” guruhida yetakchilik qilmoqda. O‘zbekiston o‘smirlar terma jamoasining keyingi uchrashuvi bugun, 18-sentabr kuni Toshkent vaqti bilan 19:00 da Falastinga qarshi bo‘lib o‘tadi.
U-16 Osiyo chempionati saralashi.
“A” guruhi, 1-tur.
O‘zbekiston – Maldiv 8:0 (1:0)Gollar: Rasul Yo‘ldoshev (12, 50, 71), Abdunozir Abdurahmonov (60, 74, 86), Islom Karimov (62), Abubakr Mo‘ydinov (83).
Izoh (0)