“O‘zneftmahsulot” avtobenzin ta’minoti bo‘yicha muammolar yo‘qligini ma’lum qildi

So‘nggi kunlarda O‘zbekistonning ayrim hududlaridagi, shu jumladan, Toshkent shahridagi ba’zi avtomobillarga yoqilg‘i quyish shoxobchalarida avtobenzinga bo‘lgan navbat ko‘payib, aholiga muayyan darajada noqulaylik tug‘dirmoqda va e’tirozlarga sabab bo‘lmoqda. “O‘zneftmahsulot” aksiyadorlik kompaniyasi ushbu holat yuzasidan izoh berdi.

“Tahlillarimizga ko‘ra, bunday holatga ayrim shov-shuv ishqibozlarining ‘Yonilg‘i ishlab chiqarish kamayib ketganligi sababli, avtobenzin taqchilligi yuzaga kelib, uning narxi oshar ekan’, degan uydirmalariga ishongan ba’zi hamyurtlarimizning avtobenzinni mumkin qadar ko‘proq zahira qilib olishga harakat qilayotganligi ham sabab bo‘lmoqda.

‘O‘zneftmahsulot’ aksiyadorlik kompaniyasi sizlarni to‘liq ishontirib ta’kidlaydiki, mamlakatimizda avtobenzin va boshqa yonilg‘i-moylash mahsulotlari ta’minoti bo‘yicha muammo yo‘q, bo‘lmaydi ham. Chunki, Respublikamizda jahon standartlariga javob beradigan barcha yonilg‘i-moylash mahsulotlari yetarli miqdorda ishlab chiqarilmoqda. Neft xomashyosi nafaqat mamlakatimiz ichki ehtiyojini qondirish uchun, balki muayyan miqdordagi yonilg‘i-moylash mahsulotlarini eksport qilish uchun ham yetarli miqdorda qazib chiqarilib, qayta ishlanmoqda”, — deyiladi “O‘zneftmahsulot” aksiyadorlik kompaniyasi matbuot xizmati xabarida.

Bundan tashqari, kompaniya ayni kunlarda yuzaga kelgan muammoni zudlik bilan hal qilish, kamchiliklarni bartaraf etish, aholini avtobenzinga bo‘lgan ehtiyojini to‘liq qondirish yuzasidan barcha chora-tadbirlar amalga oshirilayotgani va vaziyat tez fursatda o‘nglanishini ma’lum qildi. Yonilg‘i narxining oshishi haqidagi turli shov-shuvlarga ishonib, xavfsizlik texnikasi va yong‘in xavfsizligi qoidalari talablariga zid ravishda avtobenzinni to‘plab qo‘yishga ham hojat yo‘qligi ta’kidlandi.