Toshkentning shimoli-sharqida poytaxtning ikkita serqatnov Bog‘ishamol va Mirzo Ulug‘bek ko‘chalarini tutashtiradigan yo‘l uchastkasi qurilishi avj pallaga kirgan, deb yozadi “Gazeta.uz”.
Uzunligi 1,6 kilometr bo‘lgan yangi avtomobil yo‘li ilgari Kabel zavodiga taqalgan yo‘lning davomi bo‘ladi. Endi u zavodning qoq o‘rtasidan kesib o‘tib, Chamanbog‘ kichik ko‘chasi bo‘ylab, Botanika bog‘i yonidan o‘tadi va Bog‘ishamol ko‘chasiga chiqadi.
Avtomagistralni “O‘zavtoyo‘l” kompaniyasining Toshkent Ko‘prik xo‘jaligini saqlashga ixtisoslashtirilgan ta’mirlash-foydalanish korxonasi (KXSITFK) qurmoqda. Qurilish ishlari 1-avgustda boshlandi, yo‘l quruvchilari obyektni sentabr oyida foydalanishga topshirishni mo‘ljallamoqda.
Olti qatordan iborat avtomobil yo‘li chetlarida yangi piyodalar yo‘laklari, uning yonlaridagi uylarda yashovchi aholi avtomashinalari uchun kirish joylari, shuningdek, ko‘kalamzor qatorlar bo‘ladi.
Ikkita yo‘lovchi transporti bekatini qurish ko‘zda tutilgan. Kichik pudratchi “Parkent suvqurilish” kompaniyasi Salar kanali ustidan eni 41 m bo‘lgan ko‘prik yo‘l qurib berdi.
“Avtomobil yo‘lining yangi qismi foydalanishga topshirilishi bilan shahar tumanlari o‘rtasidagi masofa ancha qisqaradi. Botanika bog‘i va Kabel zavodining umumiy maydoni juda katta bo‘lgani bois ilgari ular aylanib o‘tilar edi”, — dedi Toshkent KXSITFK direktori A. Izzatullayev.
Yo‘l qurilishi bilan birga unga tutash bo‘lgan Salar kanali tozalanmoqda va uning qirg‘oqlari mustahkamlanmoqda.
Izoh (0)