Ukrainaning sobiq bosh vaziri Nikolay Azarov Moskvadagi “Ukraina” mehmonxonasida bo‘lib o‘tgan matbuot anjumanida Ukrainani qutqarish qo‘mitasi tuzilganini e’lon qildi, deb xabar bermoqda “Korrespondent.net”.
Qo‘mitaga Azarovning o‘zi boshchilik qiladi. Uni tuzish uchun Ukrainadagi hozirgi vaziyat asos bo‘lgan. “Men Ukraina hukumati rahbarligidan iste’fo berganimda turli siyosiy kuchlarni o‘zida birlashtirgan milliy birlik hukumati tuziladi va eng asosiy ish — mamlakatimizda barqarorlik, tinchlik va osoyishtalikni tiklaydi, deb o‘ylagandim”, — dedi Azarov.
“Ta‘kidlash lozimki, iste‘foimning sharti mamlakatni barqarorlashtirish, tinchlik va barqarorlikni tiklashga xalal bergan barcha noqonuniy jangarilarni, noqonuniy qurollangan bo‘linmalarni qurolsizlantirish edi. Bu davrda mening va mamlakat rahbariyatining qarorlarida jiddiy xatolarga yo‘l qo‘yilganini vaqt ko‘rsatdi. Shubhasiz, buning uchun javobgarlik hukumatning sobiq rahbari sifatida menga va mamlakatning sobiq siyosiy rahbariyatiga tushadi.
Ukrainada hokimiyatni davlat to‘ntarishi yo‘li bilan egallagan kuchlar ko‘p qon to‘kilgan urushni boshladi, o‘z xalqini yo‘q qilish, iqtisodiyotni vayron qilish siyosatini o‘tkazishni boshladi, qisqa vaqt ichida mamlakatni xaos holatiga olib keldi. Biz buni tasavvur ham qila olmasdik. Shuning uchun ham o‘zining amaliy tajribasi, bilimlari bilan mamlakatni inqirozdan olib chiqib, urushni to‘xtatib, mamlakat taraqqiyotini ta’minlay oladigan kishilarni qo‘mita tarkibiga yig‘dik”, — dedi Ukrainaning sobiq bosh vaziri.
Izoh (0)