Malayziyada AQShning Wall Street Journal nashrida chop etilgan maqolada bosh vazir Najib Razzoqning shaxsiy hisob raqamiga go‘yoki 700 million dollar o‘tkazib bergani aytilgan uchta kompaniyaga nisbatan tekshiruv boshlandi, deb xabar bermoqda “TASS”.
“Ulardan olib qo‘yilgan hujjatlar o‘rganish uchun menga berildi. Endi Aksilkorrupsiya qo‘mitasi, politsiya va Markaziy bank vakillaridan maxsus shakllantirilgan guruhning keyingi faoliyatiga aniqlik kiritiladi. Umid qilamanki, barcha jalb etilgan tomonlar maxsus qaror chiqarishga hojat qoldirmasdan tergov a’zolariga ko‘maklashadi”, − dedi Malayziya bosh prokurori Abdulg‘ani Patayl.
O‘z navbatida, bosh vazir barcha ayblovlarni rad etmoqda, uning kotibi esa Razzoq o‘z huquqlarini sudda himoya qilishini ham ma’lum qilgan. Vazirlar mahkamasi ma’muriyati maqolani “siyosiy sabotaj” deb atagan. “Bosh vazir tomonidan global iqtisodiy inqiroz davrida davlat muvaffaqiyatli boshqarilganiga qaramay ba’zilar iqtisodiy yo‘nalishga ishonchni yo‘qotib, hukumatni qoralashga va demokratik yo‘l bilan saylangan hukumat rahbarini almashtirishga urinmoqda”, − deyiladi xabarda.
Izoh (0)