Dunyo bo‘ylab sayohat qilayotgan Shveysariyaning quyosh batareyalarida ishlovchi Solar Impulse 2 samolyoti 1-iyul, chorshanba kuni qo‘shimcha yonilg‘i olmasdan va qo‘nmasdan parvoz qilish bo‘yicha jahon rekordini yangiladi, deb xabar beradi “TASS”.
Samolyotni boshqarayotgan shveysariyalik Andre Borshbergning ma’lum qilishicha, u 80 soat davomida 5663 kilometr masofani uchib o‘tgandan so‘ng yangi rekord o‘rnatgan. Shu tariqa u 2006-yilda Stiv Fosset erishgan natijadan o‘zib ketdi. O‘shanda u Virgin Atlantic Global Flyer reaktiv samolyotida 76 soat-u 45 daqiqa parvoz qilgan edi.
Shu bilan birga Solar Impulse 2 samolyoti aviatsiyada quyosh batareyalari bilan uchish vaqti va masofasi bo‘yicha ham rekord o‘rnatdi.
Eslatib o‘tamiz, noqulay ob-havo tufayli Nagoyaga qo‘nishga majbur bo‘lgan Solar Impulse 2 samolyoti 28-iyun kuni Toshkent vaqti bo‘yicha 23:00 da Nagoyadan Gavayiga parvoz qildi.
Samolyot Abu-Dabidan 9-mart kuni uchgan edi. U Ummon, Hindiston, Myanma va Xitoy hududida olti marta to‘xtab oldi. Solar Impulse 2 samolyotining qanotlari qulochi 72 metr, og‘irligi 2,3 tonnaga teng. Uning qanoti 17,2 mingta quyosh batareyalari bilan qoplangan. Samolyotning maksimal tezligi soatiga 140 kilometrni tashkil etadi.
Izoh (0)