Janubiy Koreya hukumati MERS koronavirusi tarqalishi bilan mamlakat iqtisodiyotiga yetkazilgan salbiy ta’sirlar oqibatlarini yumshatish maqsadida parlamet orqali 15 trillion von (13,5 milliard dollar) miqdoridagi qo‘shimcha byudjetni tasdiqlatishni rejalashtirmoqda. Bu haqda “RIA Novosti” xabar bermoqda.
Janubiy Koreya Moliya vazirligi mamlakatning 2015-yilgi yalpi ichki mahsuloti (YaIM) o‘sishi hajmini 3,1 foizgacha qisqartirdi. Bu yil boshida prognoz qilingan ko‘rsatkich – 3,8 foizdan va o‘tgan yilgi – 3,3 foizlik ko‘rsatkichdan sezilarli kam. 2016-yilda YaIM 3,5 foizga o‘sishi taxmin qilinmoqda.
25-iyun holatiga ko‘ra Janubiy Koreyada 180 kishi MERS koronavirusi bilan zararlangan, 29 kishi vafot etgan, 2,6 ming kishiga esa karantin tartibi tavsiya etilgan. Kasallikning tarqalishi sayyohlik sohasi, mehmonxona va restoran biznesi, transport va shou-biznesga salbiy ta’sir ko‘rsatdi.
Izoh (0)