Yaponiyada “hissiyotli” robotlarning birinchi mingtasi bir daqiqa ichida sotilib ketdi

Yaponiyada mingta odamsimon robot bir daqiqa ichida sotilib ketdi, deb xabar beradi Softbank kompaniyasi sayti.

Softbank kompaniyasi tomonidan ishlab chiqarilayotgan ushbu mashina Pepper deb nomlanadi, robotga buyurtmalar qabul qilinmaydi. Qo‘shimcha sotuvlar to‘g‘risida ishlab chiqaruvchi iyul oyida ma’lumot beradi.

“Pepper – birinchi odamsimon robot bo‘lib, u odamlar bilan birga yashash uchun yaratilgan. U uy yig‘ishtirish, taom tayyorlash va boshqa shu kabi qobiliyatlarga ega emas. Pepper – ijtimoiy robot bo‘lib, u siz bilan gaplashishi, sizning hissiyotlaringizni payqab olib, ularga o‘z munosabatini bildirishi mumkin. U mustaqil harakatlanib yashay oladi”, — deyiladi uning reklamasida.

Pepperning bir nusxasi 198 ming yenga (1600 dollar atrofida) narxlangan, biroq robotga xizmat ko‘rsatish uchun tuziladigan majburiy shartnoma xaridni birmuncha qimmatlashtiradi. Softbank har oyda mingta nusxadan sotishni rejalashtirmoqda.