20-may kuni O‘zbekiston Xotin-qizlar qo‘mitasi tashabbusi bilan bir qator davlat va jamoat tashkilotlari hamkorligida “Ma’naviyatimizni asrab qolaylik!” ma’rifiy tadbiri o‘tkazildi, deb xabar bermoqda “Oila davrasida” gazetasi. Tadbirda senatorlar, deputatlar, madaniyat va san’at mutasaddilari, Toshkent shahridagi to‘yxona va restoranlar rahbarlari, xonandalar va jurnalistlar ishtirok etdi.
“Ba’zan ekranlarimizdagi kliplar, qo‘shiqchi-yu raqqosalarimiz yoki aktrisalarimizning bachkana qiliqlarini ko‘rib, mantiqsiz so‘zlarini tinglab, “ma’naviyatimizni, yoshlarimiz tarbiyasini soat sayin boy berib qo‘ymayapmizmi?”, degan savol xayolingdan o‘tadi. Bu borada ayrim xonandalarimizning turli ajnabiy va milliylikka yot liboslarni kiyishlari, yoshlarning tarbiyasiga salbiy ta’sir ko‘rsatadigan sayoz qo‘shiq matnlari, qo‘pol, behayo va beandisha harakatlar aks ettirilgan kliplarning oila davrasida ko‘riladigan ekranlarga uzatilayotganini nima bilan izohlash mumkin?!”, — dedi O‘zbekiston Bosh vazirining o‘rinbosari, Xotin-qizlar qo‘mitasi raisi Elmira Bositxonova.
Milliy estrada san’atini rivojlantirish va muvofiqlashtirish kengashi raisi Iqbol Mirzo tadbirda estrada san’ati mahsulotlarining ma’naviy saviyasini qonun yo‘li bilan tartibga solish payti kelganini ta’kidladi.
Tadbirda aytilishicha, faqat Toshkent shahrida 140 dan ziyod to‘yxona va restoranlar faoliyat yuritmoqda. O‘rnatilgan tartibga qaramay ayrim to‘ylar dabdaba va mol-dunyoni ko‘z-ko‘z qilish, hayosiz raqslar maydoniga aylanib qolmoqda.
“O‘zbekiston — Robinzon yashaydigan orol emas, agar kimki, bugun demokratiya, istaganimni qilaman, deb o‘ylasa, xalq, jamiyat fikri bilan hisoblashmasa, qattiq adashadi”, — deb yozadi “Oila davrasida” gazetasi.
Izoh (0)