Suv ustida joylashgani bilan mashhur bo‘lgan Italiyaning Venetsiya shahriga odatda daryo yoki dengiz bo‘yida joylashgan shaharlarni o‘xshatishadi. Biroq na dengiz, na daryo ustida joylashmagan Toshkentning ham Venetsiyaga o‘xshash qismi borligidan ko‘pchilik toshkentliklar ham xabardor bo‘lmasa kerak.
Facebook’dagi X-Places (Tashkent) guruhi tashkilotchisi Rustam Husanov va taniqli o‘lkashunos Boris Golender tomonidan Toshkentning eski shahar qismida joylashgan ana shunday maskanga sayohat tashkil qilindi.
“Nasimov.uz”ning yozishicha, Toshkent shahriga suv Chirchiq daryosidan Bo‘zsuv kanali orqali keladi. O‘z navbatida Bo‘zsuv to‘rtta asosiy irmoqqa — Salor, Anhor, Qorasuv va Kaykovusga bo‘linadi, ular yana kichikroq tarmoqlarga butun shahar bo‘ylab tarqalib ketgan.
“Toshkent Venetsiyasi”ni esa Bo‘zsuvning o‘ng tarmog‘i bo‘lmish Kaykovus arig‘i bo‘ylarida uchratish mumkin. Eski shaharning bu qismida xuddi Venetsiyadagidek uylardan to‘g‘ri ko‘chaga emas, balki kanallarga chiqiladigan holatga guvoh bo‘lasiz.
Bu hudud yaqinida yana bir antiqa qurilmani ko‘rish mumkin: Anhor Bo‘rijar kanalining ustidan o‘tgan, biroq ikkala suv manbasi bir-biriga qo‘shilmagan.
Izoh (0)