27-may kuni Osiyo Chempionlar Ligasida 1/8 final bosqich o‘yinlari yakuniga yetdi. Uchrashuvlardan keyin Osiyo futbol konfederatsiyasining koeffitsiyentlar jadvalida o‘zgarishlar ro‘y berdi. Bu haqda BAA chempionati menejeri Alisher Nikimbayevga tayanib, “Championat.asia” xabar qilmoqda.
Qatarning “Laxviya” klubi keyingi bosqich yo‘llanmasini qo‘lga kiritishi natijasida g‘arbiy mintaqada to‘rtinchi o‘rinda bo‘lgan O‘zbekiston beshinchi pog‘onaga tushib ketdi. Bu esa 1+2 ko‘rinishidagi yo‘llanma degani, ya’ni oliy liga chempioni to‘g‘ridan-to‘g‘ri Osiyo Chempionlar Ligasi guruh bosqichiga chiqadi, O‘zbekistonning yana ikki jamoasi esa saralash bosqichida ishtirok etadi.
2015-yilda qayd etilgan natijalar o‘z navbatida 2017—2020-yillar uchun amal qiladi. Bu to‘rt mavsum degani. Shunday bo‘lsa-da, O‘zbekiston to‘rtinchi o‘ringa ko‘tarilish imkoniyatiga ega. Buning uchun “Laxviya” 1/4 final bosqichda omadsiz ishtirok etishi va aksincha O‘zbekiston milliy terma jamoasi joriy yil bo‘lib o‘tadigan barcha rasmiy o‘yinlarda ijobiy natijaga erishib, FIFA reytingida ko‘proq ochkoga ega bo‘lishi kerak. Shundagina O‘zbekiston oliy ligasi klublari 2+2 ko‘rinishdagi yo‘llanmaga ega bo‘ladi.
Eslatib o‘tamiz, 2016-yil ham O‘zbekiston oliy ligasi 3+1 ko‘rinishda joyga ega. Ammo keyingi yilgi natijalar o‘rinlar soniga o‘zgartirish kirita olmaydi.
Izoh (0)