Fransiya poytaxti Parij shahrida tennis bo‘yicha “Katta Dubulg‘a” turkumiga kiruvchi, yilning to‘rtta yirik turniridan ikkinchisi hisoblangan “Rolan Garros” musobaqasining asosiy to‘r bahslari davom etmoqda, deb xabar beradi “Olamsport.com”.
Mukofot jamg‘armasi 28 million yevroni tashkil etuvchi Fransiya Ochiq chempionatining asosiy to‘rida O‘zbekistonning birinchi raqamli tennischisi Denis Istomin ilk davradayoq mag‘lubiyatga uchradi.
Avstraliyalik Nik Kirgiosga qarshi kechgan bahsda Istomin 3:6, 4:6, 3:6 hisobida imkoniyatni boy berib qo‘ydi. Nik turnirning 29-raqamli tennischisi sifatida qayd etilgan. Istomin esa dunyo reytingida 77-pog‘onadan joy olgan.
Eslatib o‘tamiz, “Rolan Garros” turniri g‘olibi 1 million 800 ming yevroga o‘z hamyonini boyitib oladi. Yakkalikda finalga yetib kelgan tennischi esa 900 ming yevroga ega bo‘ladi.
Izoh (0)