Xitoy hukumati Janubiy Xitoy dengizidagi keskinlikni yumshatish borasida ish olib borishi kerak. Bu haqda, “TASS”ning xabar berishicha, AQSH davlat kotibi Jon Kerri Xitoy tashqi ishlar vaziri Van I bilan bo‘lib o‘tgan qo‘shma matbuot anjumanida aytib o‘tdi.
“Xitoy hukumati Janubiy Xitoy dengizidagi keskinlikni kamaytirish bo‘yicha choralar ko‘rishi kerak”, - dedi u. Kerri shuningdek Xitoyning mintaqadagi orollarni o‘zlashtirish tezligi va ko‘lami borasida ham xavotirlarini bildirdi.
Avvalroq Xitoy Tashqi ishlar vazirligi The Wall Street Journal gazetasida Janubiy Xitoy dengizidagi bahsli Spratli orollaridan Xitoyni siqib chiqarish uchun AQSH samolyotlari va kemalaridan foydalanilishi mumkinligi haqida axborot paydo bo‘lgani yuzasidan xavotirlarini bildirgandi.
“Biz tegishli mamlakatlarni tavakkalchilikka asoslangan va ig‘vogarona harakatlarni amalga oshirmaslikka, mintaqada tinchlik va barqarorlikni ta’minlash uchun amaliy choralar ko‘rishga chaqiradi”, - dedi Xitoy TIV vakili Xua Chunin 13-may kuni.
Xitoy bir necha o‘n yillardan beri Janubiy Xitoy dengizidagi bir qator orollarni Vyetnam, Bruney, Malayziya, Filippin kabi mamlakatlar bilan talashib keladi. 2013-yil oxiridan beri rasmiy Pekin ushbu orollarni o‘zlashtirish maqsadida bu yerlarda keng miqyosli qurilish ishlarini olib bormoqda.
Izoh (0)