Burundidagi davlat to‘ntarilishi tashkilotchilaridan biri ularning urinishlari muvaffaqiyatsizlikka uchraganini tan oldi, deya xabar bermoqda “RIA Novosti”.
“Shaxsan men urinishlarimiz puchga chiqqanini e’tirof etaman. Biz mavjud rejimni qat’iyan qo‘llab-quvvatlaydigan harbiylar qarshiligiga uchradik”, — deya ma’lum qildi general Siril Ndayirukiye.
Politsiyaning yuqori lavozimli vakili tasdiqlashicha, fitnachilarga ko‘mak bergan qo‘shinlar Burundi poytaxti Bujumburadagi teleradiouzatish majmuasiga hujumlari hukumat kuchlari tomonidan daf qilingach, tushkunlikka tushib qolgan. “Isyonchilarning ba’zilari taslim bo‘ldi, qolganlari qochib, jon saqlamoqda”, — deya qo‘shib qo‘ydi u.
Eslatib o‘tamiz, Afrika qit’asida joylashgan Burundi davlatida harbiy davlat to‘ntarishiga urinish bo‘lgan, keyinroq u bostirilgan edi.
13-maydan 14-mayga o‘tar kechasi politsiya kiyimidagi noma’lum shaxslar ikkita xususiy radiostanisya va telekanalni egallab, general Godfrua Niyombare nomidan Nkurunziza uchinchi marta prezidentlik saylovida ishtirok etish istagini bildirib, Konstitutsiyani buzgani uchun hokimiyatdan chetlatilishi haqidagi murojaatni o‘qib eshittirgan.
O‘sha paytda Tanzaniyada bo‘lib o‘tayotgan Afrika davlatlari rahbarlari sammitida ishtirok etayotgan Burundi prezidenti Pyer Nkurunziza o‘zining Twitter’dagi sahifasida mamlakat aholisini xotirjamlikka chaqirib post joylashtirgan.
14-may, payshanba kuni prezident mamlakatga qaytib kelgan.
Izoh (0)