Qatar poytaxti Doha shahrida erkin, yunon-rum va ayollar kurashi bo‘yicha Osiyo chempionati davom etmoqda. Kecha musobaqaning ikkinchi kungi bahslarida yana bir guruh g‘olib va sovrindorlar aniqlandi. Quvonarlisi, ular orasida o‘zbekistonlik kurashchilar ham bor, deb xabar bermoqda “Olamsport”.
Jumladan, -70 kg vazn toifasida gilamga chiqqan Osiyo o‘yinlari g‘olibi Bekzod Abdurahmonov barcha raqiblarini mag‘lubiyatga uchratib, Osiyo chempioniga aylandi. U oltin medal uchun kechgan murakkab final bahsida tojikistonlik raqibi Zelimxon Yusupovni 6:5 hisobida mag‘lub etdi.
Ta’kidlash joiz, Bekzod Abdurahmonov finalga qadar xitoylik Xayvey Lingni 8:0, chorak finalda yaponiyalik Takafumi Kojimani 10:2, yarim finalda esa hindistonlik Parvin Ranani 13:8 hisobida taslim etgan edi.
Terma jamoamizning yana bir yetakchi polvoni Rashid Qurbonov -74 kg vazn toifasida bronza medalini qo‘lga kiritdi. Hamyurtimiz yarim final bellashuvida eronlik Peyman Murtazo Yaraxmadiga 0:2 hisobida imkoniyatni boy berib qo‘ydi. Bronza medali uchun kechgan bahsda esa qirg‘izistonlik Muslim Evloyevdan 3:0 hisobida ustun keldi.
Ma’lumot o‘rnida aytib o‘tish joiz, vakilimiz yarim finalga qadar avvaliga xitoylik Chongyao Jangni 6:3, chorak finalda esa iroqlik Ahmad Muhsin Kadimni 11:0 hisobida mag‘lubiyatga uchratgan edi.
Ayollar kurashi bahslarida terma jamoamiz a’zolari ilk bahslardayoq mag‘lubiyatga uchradi. -48 kg vazn toifasidagi vakilamiz Dauletbike Yaxshimuratova qozog‘istonlik Tatyana Bakatyukka 0:2, -58 kg vaznda kurashgan Salomat Ko‘chimova hindistonlik Gita Gitaga 0:11 hisobida mag‘lub bo‘ldi.
Eslatib o‘tamiz, kechagi bahslarda Ruslan Pliyev (-65 kg) va Umidjon Ismanov (-86 kg) bronza medallariga sazovor bo‘lishgandi. Yana bir sportchimiz Nodirjon Safarov (-57 kg) esa beshinchi o‘rinni egallagandi.
Demak, hozircha terma jamoamiz hisobida 1 ta oltin, 3 ta bronza medali bor.
Izoh (0)