Toshkent shahrida bir-biri bilan poyga o‘ynagan jamoat transporti haydovchilari va ishga mast holda chiqqan chiptachi jazoga tortildi, deb yozadi “Oila davrasida” gazetasi.
Avtobus yo‘lovchisining qayd etishicha, dastlab unga qo‘pol munosabatda bo‘lgan chiptachi ayolda spirt hidini sezgan, keyingi bekatda esa chiptachi tushib, do‘kondan spirtli ichimlik va sigaret olib chiqqan. Yo‘lovchi maktablarning 500 metr radiusida spirtli ichimlik sotish mumkin emasligini, ammo bu do‘kondan 100 metr uzoqlikda maktabga ko‘zi tushganini qayd etgan.
So‘ngra avtobus birdan tezlashgan, yo‘lovchilar haydovchi yon tomondan kelgan boshqa avtobus bilan poyga o‘ynaganiga guvoh bo‘lgan. Tezlik yuqoriligi tufayli yo‘lovchilardan biri yiqilib tushgan, boshqalari ham talofat ko‘rgan, ko‘pchilik keyingi bekatdan tushib qolgan. Old qatordagi yo‘lovchi ayol haydovchiga tanbeh berganda unga qo‘pol munosabatda bo‘lib, qo‘l ko‘tarmoqchi bo‘lgan, biroq boshqa yo‘lovchilar bunga yo‘l qo‘ymagan.
Xabar muallifi esa Yagona interaktiv davlat xizmatlari portalining aloqa markaziga qo‘ng‘iroq qilib, operatorga bo‘lgan voqeani so‘zlab berganini ma’lum qilgan. O‘n kundan keyin uning elektron pochtasiga “Toshshahartransxizmat”dan kelgan xabarda poygachi haydovchilar va ichuvchi chiptachi aybiga yarasha jazo olgani aytilgan.
Izoh (0)