Polshaning Shetsin shahrida o‘q otish bo‘yicha paralimpiyachilar o‘rtasida o‘tkazilgan jahon kubogi bahslarida O‘zbekiston vakili Server Ibragimov jahon rekordini yangiladi. Bu haqda O‘zbekiston Milliy axborot agentligi xabar bermoqda.
Jahon kubogi bahslarida 40 ga yaqin davlatdan 300 nafardan ziyod sportchi sovrinli o‘rinlar va 2016-yil Braziliyada o‘tkaziladigan XV yozgi Paralimpiya o‘yinlarining yo‘llanmasini beruvchi muhim reyting ochkolari uchun bahslashdi.
Musobaqaning o‘n metr masofadan to‘pponchada o‘q otish bo‘yicha o‘tkazilgan bahslarida O‘zbekiston sharafini himoya qilgan Server Ibragimov saralash bosqichida 578 ochko jamg‘arib, finalga chiqdi. Tajribali sportchi hal qiluvchi bahsda 198,9 ochko jamg‘arib, oltin medalni qo‘lga kiritdi. Uning natijasi jahonning yangi rekordi sifatida qayd etildi.
O‘zbekistonlik sportchi jahon kubogida ko‘rsatgan natijasi bilan dunyo reytingida birinchi o‘rin egalladi va 2016-yil Braziliyada o‘tkaziladigan Paralimpiya o‘yinlarining yo‘llanmasini ham naqd qilib qo‘ydi.
“Paralimpiya o‘yinlari yo‘llanmalarini qo‘lga kiritgan sportchilarimiz 19 nafarga yetdi, – dedi O‘zbekiston Milliy paralimpiya assotsiatsiyasi bosh kotibi Omon G‘afurov. – Paralimpiyachilarimizni oldinda yana ko‘plab xalqaro musobaqalar kutmoqda. Umid qilamizki, sportchilarimiz bu musobaqalarda ham muvaffaqiyatli ishtirok etib, yo‘llanmalarimiz sonini yanada ko‘paytiradi”.
Izoh (0)