O‘zbekiston milliy terma jamoasi bosh murabbiy Mirjalol Qosimov Jahon chempionati 2-saralashi va Osiyo Kubogi−2019 uchun qur’a natijasi borasida fikr bildirdi, deb xabar bermoqda “Championat.asia”.
Eslatib o‘tamiz, O‘zbekiston terma jamoasi “H” guruhida Bahrayn, Fillipin, KXDR va Yamanga qarshi kurash olib boradi.
“Qur’adan ko‘nglim to‘ldi. Bizning guruhimizda kuch jihatdan teng jamoalar yig‘ildi va biz qiziqarli uchrashuvlar guvohiga aylanishimiz mumkin. Maqsadimiz - birinchi o‘rinni egallab, jahon chempionatida ishtirok etish uchun kurashni davom ettirish. Biz guruhda yetakchi hisoblanamiz va bu vazifani bajara olamiz.
Har bir jamoa haqida alohida gapiradigan bo‘lsak, raqiblarimiz borasida quyidagilarni aytishim mumkin:
Bahrayn kuchli va bizga tanish jamoa. Bu terma jamoaning imkoniyatlarini, taxminan qanday uslubda o‘ynashini bilamiz, chunki ular bilan bir necha marta uchrashuv o‘tkazganmiz. KXDR terma jamoasi bilan ham kurash olib borgan edik. Ularga qarshi o‘ynash oson emas, ammo shimoliy koreyaliklarni mag‘lub eta oldik. Filippin va Yaman terma jamoalari haqida hech narsa deya olmayman, chunki Filippin bilan biror marta o‘ynamaganmiz, Yaman bilan esa 90 yillarda bor-yo‘g‘i ikki marta to‘qnash kelganmiz” − deydi Mirjalol Qosimov.
O‘zbekiston terma jamoasi saralashni mehmonda KXDR terma jamoasiga qarshi o‘yin bilan boshlaydi. Bu borada Qosimov quyidagilarni ta’kidladi:
“Birinchi uchrashuv doimo qiyin bo‘ladi. Ammo har qanday turnirni g‘alaba bilan boshlash juda muhim. Jamoamiz juda ahil va iqtidorli futbolchilardan tashkil topgan. Birinchi o‘yinda 3 ochko olishga kuchimiz yetadi” − dedi Qosimov.
Izoh (0)