Facebook’dagi “Voditeli Tashkenta” guruhiga Toshkent shahrida haydovchilar tomonidan yo‘l harakati qoidalari qo‘pol ravishda buzilgani aks etgan videolavha joylashtirildi.
Avtomobil videoregistratori orqali yozib olingan videoda Abay ko‘chasida bir nechta avtomobil qarama-qarshi yo‘nalishda harakatlanib, oldindan to‘g‘ri yo‘nalishda avtomobil kelganda, o‘z yo‘nalishiga qaytish o‘rniga qarama-qarshi yo‘nalishdagi yo‘lning boshqa bo‘lagiga o‘tgani aks etgan.
Jumladan, dastlab davlat raqami 01 M 322 JA bo‘lgan oq Spark, keyin raqami aniqlanmagan oq Spark xuddi shunday harakatni takrorlagan. So‘ngra davlat raqami 01 P 821 FA bo‘lgan oq Nexia qarama-qarshi yo‘nalishdan kelib, to‘g‘ri yo‘nalishdan kelayotgan avtomobilning qarshisida to‘xtab qolgan. Orqasidan raqami aniqlanmagan kulrang Lacetti kelib, qarama-qarshi yo‘nalishdagi yo‘lning boshqa bo‘lagiga o‘tib ketgach, bir necha urinishdan keyin Nexia ham boshqa bo‘lakka o‘tib ketgan.
Shuningdek, davlat raqami 01 U 804 PA bo‘lgan oq Spark, davlat raqami 01 L 615 OA bo‘lgan qora Nexia, raqami aniqlanmagan oq Lacetti va boshqa ko‘plab avtomobillar yo‘lning qarama-qarshi yo‘nalishlarini ajratuvchi chiziqni bosib va qarama-qarshi yo‘nalishga o‘tib harakatlangan.
Guruh foydalanuvchilari qarama-qarshi yo‘nalishda harakatlangan haydovchilarga nisbatan nafratini yashirib o‘tirmagan. Shuningdek, ularga qarama-qarshi yo‘nalishdagi yo‘lning boshqa bo‘lagiga o‘tishga ham imkon bermaslik lozimligi qayd etilgan.
137 soniya davom etgan lavhada jami 15 ta avtomobil qarama-qarshi yo‘nalishlarni ajratuvchi chiziqni bosgan yoki qarama-qarshi yo‘nalishga o‘tib harakatlangan. O‘zbekistonda ushbu qoidabuzarlik uchun eng kam ish haqining 10 baravari − 1 184 000 so‘m miqdorida jarimaga tortilishi belgilab qo‘yilgan. Demak, 2 daqiqadan ko‘proq vaqt oralig‘ida jami 17 760 000 so‘m jarima qayd etilishi mumkin edi.
Izoh (0)