Chevrolet kompaniyasi yangi avloddagi Malibu sedanining fotosuratlarini namoyish etdi, deb xabar bermoqda “Motor.ru”. Avvalgi versiyasidan 140 kilogrammga yengilroq bo‘ladigan modelning ilk ommaviy namoyishi Nyu-Yorkdagi avtosalonda bo‘lib o‘tadi.
Vazn yengillashuvining uchdan bir qismi o‘ta chidamli po‘latdan ishlangan yangi kuzov konstruksiyasi hissasiga to‘g‘ri keladi. Shuningdek, qator elementlar mustahkamligini saqlab qolgan holda ingichkalashtirilgani ham og‘irlikni kamaytirishga imkon bergan.
Qayd etilishicha, quvvat moslamalari tarkibidan 1,8 litrli benzinli dvigateldan tashqari Volt elektromotori hamda 1,5 kilovatt/soat quvvatga ega litiy-ion batareyalar to‘plami o‘rin oladi. Ularning umumiy quvvati 182 ot kuchini tashkil etadi.
Faqatgina elektromotor ishlab turganda Malibu 86 kilometr/soatgacha tezlikda harakatlana oladi, yuqori tezlikda esa benzinli dvigatel qo‘shiladi. Qo‘shma rejimda Malibu 100 kilometrga 5,2 litr benzin sarflaydi. Shuningdek, to‘xtash vaqtida yig‘iladigan energiyani saqlab olish tizimi ham qo‘llaniladi.
Eslatib o‘tamiz, Chevrolet yangi avloddagi Malibu avtomobillarida o‘smirlarning harakatlarini ota-onalarga yetkazib beruvchi tizim o‘rnatilishini ma’lum qilgan edi.
Izoh (0)