Sirg‘ali bozori Hojikentga ko‘chadi, mobil operatorlar abonent to‘lovini bekor qiladi, Toshkentda Ikea ochiladi

1-aprel − hazil-mutoyiba kuni munosabati bilan O‘zbekistonning qator elektron ommaviy axborot vositalari ham hazilomuz xabarlarni chiqarishga qaror qildi. E’tiboringizga ulardan eng shov-shuvlilarini havola etamiz.

Sirg‘ali avtobozori Hojikentga ko‘chadi

“Bibi.uz” saytining hazillashishicha, Sirg‘ali avtomobil bozori 15-maydan Bo‘stonliq tumanidagi “Hojikent” temir yo‘l stansiyasi yaqiniga ko‘chiriladi. Bunga sabab sifatida Sirg‘ali bozorida joy yetishmovchiligi, Toshkent−Hojikent elektropoyezdi yo‘lovchilari oqimini ko‘paytirish va haydovchilarning Sirg‘ali bozori uzoqligi haqidagi shikoyatlari kabilar ko‘rsatilgan.

Beeline, Ucell va UMS barcha tarif rejalarida abonent to‘lovini bekor qiladi

“Mobinfo.uz” sayti O‘zbekistondagi Beeline, UMS va Ucell mobil aloqa operatorlari tomonidan 2015-yil 2-apreldan barcha tarif rejalarida abonent to‘lovi bekor qilinishini ma’lum qildi. Shuningdek, UzMobile va Perfectum Mobile kompaniyalari ham ushbu aksiyalarga qo‘shilishini ma’lum qilgan. Yangilik nega aynan 2-apreldan kiritilishi haqidagi savolga agar 1-apreldan joriy qilinganda ko‘pchilik buni hazil deb o‘ylashi mumkinligi bilan javob qaytarilgan.

Shuningdek, Ucell abonent har safar qo‘ng‘iroq qilib tusha olmaganda uning hisobiga 0,01 dollar o‘tkazib berishi, Beeline esa 1 Megabayt internet taqdim etishi ma’lum qilingan. Tabiiyki, xabar oxirida nashr hammani 1-aprel bilan tabriklagan.

Toshkentda IKEA do‘koni ochiladi

Shvetsiyaning uy jihozlari va ro‘zg‘or buyumlari savdosi bilan shug‘ullanuvchi dunyoga mashhur IKEA tarmog‘i Toshkentda ham o‘z do‘konini ochishi haqidagi xabarni “Afisha.uz” tarqatdi. Nashr xabar oxiriga “1-aprel huquqlari asosida” deya izoh berishni unutmagan.

Qovun, somsa, manti, kabob hidli atirlar

Facebook’dagi “Potrebitel.uz” guruhida esa dastlab Farg‘ona vodiysining Bosvoldi navli qovuni ostida tayyorlangan Bosvaldini di Rishtan atirlari Yevropada sotuvga chiqarilgani haqidagi xabar paydo bo‘ldi.

Keyin esa milliy taomlarimizdan somsa, manti va kabob hidi bilan ishlab chiqariladigan atirlar haqida xabar berildi.