Tojikiston Respublikasi Prezidenti Emomali Rahman Islom Karimovni O‘zbekiston Prezidentligiga qayta saylangani munosabati bilan tabriklab, telegramma jo‘natdi. Bu haqda Tojikiston Prezidenti matbuot xizmati xabar bermoqda.
“Qayta saylanishingiz Sizning uzoqni ko‘zlagan rahbarligingiz ostida olib borilayotgan va O‘zbekistonni har tomonlama rivojlantirish, uning salohiyatini mustahkamlash va xalq farovonligini oshirishga qaratilgan siyosatga yuksak ishonch borligidan dalolatdir.
Mintaqada xavfsizlik va barqarorlikni ta’minlashning muhim omili bo‘lgan hamda davlatlarimiz va xalqlarimizning tub manfaatlariga javob beruvchi Tojikiston va O‘zbekiston o‘rtasidagi do‘stlik va yaxshi qo‘shnichilik munosabatlarining oldinda turgan davri samarali hamkorlikning yangi namunalari bilan boyishiga aminmiz”, − deyiladi tabrik telegrammasida.
Eslatib o‘tamiz, Markaziy saylov komissiyasi tomonidan e’lon qilingan O‘zbekiston Prezidenti saylovining dastlabki natijalariga binoan Islom Karimovga saylovchilarning 90,39 foizi ovoz bergani ma’lum bo‘ldi.
Avvalroq, Islom Karimovni O‘zbekiston Prezidenti saylovidagi g‘alaba bilan Rossiya Prezidenti Vladimir Putin, Qozog‘iston Prezidenti Nursulton Nazarboyev va Xitoy Xalq Respublikasi Raisi Si Szinpin tabriklagani xabar berilgan edi.
Izoh (0)