Samarqand viloyatining Bulung‘ur tumanida ichkilikbozlikka berilib ketgan erkakning hayotiga o‘z oilasi a’zolari nuqta qo‘ydi, deb yozadi “Na postu” gazetasi.
Bu ayolning ikkinchi eri bo‘lib, birinchi turmushidan bir o‘g‘li, ikkinchi turmushidan ikki o‘g‘li va bir qizi bor edi. To‘ng‘ich o‘g‘lini ikkinchi eri chiqishtirmagach, ayol uni o‘zining ota-onasinikiga jo‘natib yuradi. O‘g‘il vaqti-vaqti bilan onasi va ukalaridan xabar olib turadi.
Qayd etilishicha, bir kuni erkak odatdagidek mast holda uyga qaytgach, ayol qizining qichqirganini eshitadi. Uyga kirgan ayol dahshatdan qotib qoladi: u eri o‘zining voyaga yetmagan qizini zo‘rlashga urinayotganiga ko‘zi tushadi. Bor kuchi bilan erini surib, qizini qochirib yuboradi.
So‘ngra o‘zining birinchi turmushidan bo‘lgan 20 yoshli to‘ng‘ich o‘g‘lini, shuningdek 18 yoshli ikkinchi o‘g‘lini chaqiradi. Ularga bo‘lgan voqeani aytib berib, erini o‘ldirishni taklif qiladi. Qizi avval ham otasidan shikoyat qilganini, biroq u aldayapti deb o‘ylaganini aytadi va undan qutulishning boshqa chorasi yo‘qligini ma’lum qiladi.
Yarim tunda, erkak uxlab yotganda o‘g‘illar xonaga kirib, uni temir quvur bo‘lagi bilan bir necha marta urishadi, keyin esa bo‘yniga arqon bog‘lashadi, so‘ngra jasadni qurib qolgan kanalga olib borib tashlashadi.
Sudda ayol o‘g‘illarini jinoyatga boshlaganini tan oldi. Samarqand viloyati jinoyat ishlari bo‘yicha sudyasi boshchiligidagi sud ayolni 14 yilga, to‘ng‘ich o‘g‘lini 15,5 yilga, ikkinchi o‘g‘lini 6 yilga ozodlikdan mahrum etdi.
Izoh (0)