Joriy yilning may oyida Jahon iqtisodiyoti va diplomatiya universitetida Birlashgan Millatlar Tashkilotining 70 yilligi hamda universitetda an’anaga aylangan BMT Modelining 10 yilligiga bag‘ishlangan navbatdagi BMT Modeli o‘tkaziladi.
Avvalgi konferensiyalardan farqli ravishda bu yilgi BMT Modelini noodatiy tarzda o‘tkazish uchun unga 3 kun ajratildi.
Ushbu 3 kun belgilangan mavzularni haqiqiy diplomatlarday BMT ruhida muhokama qilish imkoniyatini taqdim etish bilan birga, yana qator foydali va qiziqarli tadbirlarni qamrab oladi.
Konferensiyada 3 qo‘mita – BMT Xavfsizlik Kengashi, Jahon sog‘liqni saqlash tashkiloti hamda BMT Bosh Assambleyasining 5-qo‘mitasi ayni damda dolzarb bo‘lgan mavzular bo‘yicha ish olib boradi. Konferensiyadan avvalroq, aprel oyida tadbir ishtirokchilari O‘zbekistondagi ko‘zga ko‘ringan professorlarning anjumanda muhokama qilinishi ko‘zda tutilayotgan mavzular bo‘yicha ma’ruzalarida qatnashish imkoniyatiga ega bo‘ladi.
Ta’kidlanishicha, ishtirokchilarga yana ko‘plab kutilmagan sovg‘alar tayyorlanmoqda.
JIDUdagi BMT Modelida ishtirok etish istagida bo‘lganlar 21-martdan 5-aprelga qadar o‘zlari haqidagi rezyume hamda anjumanda qatnashishdan ko‘zlagan maqsadlarini ingliz tilida yozgan holda uwedmun2015@gmail.com elektron pochtasiga jo‘natishi lozim.
Ma’lumot uchun, JIDUdagi BMT Modeli ilk bor 2005-yilda tashkil etilgan. Bugunga qadar o‘tkazilgan konferensiyalarda JIDU talabalaridan tashqari, Toshkent Xalqaro Vestminster universiteti, Toshkentdagi Singapur menejmentni rivojlantirish instituti, O‘zbekiston davlat jahon tillari universiteti, Toshkent davlat sharqshunoslik instituti va boshqa OTM talabalari faol qatnashib kelgan.
Izoh (0)