Toshkent markazida, Ko‘kaldosh madrasasining etagida joylashgan ziyo maskani – kitob do‘konlarida shayx Muhammad Sodiq Muhammad Yusuf hazratlarining bironta kitoblari qolmaganini ma’lum qilishdi, deb xabar bermoqda “Info.islom.uz”.
“Do‘kondorlarning aytishicha, so‘nggi bir necha kun ichida shayx hazratlarining kitoblariga bo‘lgan talab misli ko‘rilmagan darajada kuchayib, peshtaxtalar bo‘shab qolgan. Bu ham bo‘lsa, xalqimizning ulug‘ ustozga bo‘lgan mehr-muhabbati, ixlosining namunasidir”, − deyiladi xabarda.
“Hilol-nashr” kitob do‘konlari ishlamay turgan uch kun davomida yuzlab kitobsevarlar, muxlislar kelib, afsus bilan qaytib ketayotgan edilar. Poytaxtdagi va viloyatlardagi do‘konlar ishga tushgach, ahvol kutilganidan ham ziyoda bo‘ldi. Shu ikki kun davomida do‘konlarda bironta kitob qolmadi, sotuvchilarning qo‘li qo‘liga tegmadi, tashrif buyurganlarning keti uzilmadi. Qayd etilishicha, bir daqiqa ham bo‘sh qolmayotgan do‘konlarga kelgan kitobxonlar “Yangi kitoblar qachon chiqadi?”, “Yana qaysi kitoblar chiqadi yaqin-orada?” deb tinmay so‘rab turishibdi.
“Ulug‘ alloma shayx Muhammad Sodiq Muhammad Yusuf hazratlari payg‘ambarlarning chinakam vorisi sifatida tinmay ijod qilib, ulkan ilmiy meros qoldirdilar. Hozirgi kunda chop etilgan yuzdan ortiq kitoblaridan tashqari, ‘Hilol-nashr’ nashriyotiga qo‘lyozmasi topshirilgan kitoblari ham anchagina. Binobarin, hali chop etiladigan kitoblarimiz juda ko‘p. Inshaalloh, tez kunda omborlardagi yangi kitoblarimiz ham xalqimizga taqdim etiladi. Shu qadar ilm-ma’rifatga tashna, kitobsevar xalqimiz bor ekan, kitoblarimiz to‘xtamay chop bo‘laveradi, bu ulkan ilm bulog‘ining hikmat sarchashmasi ayriliq dog‘iga malham bo‘laveradi”, − deyilgan xabarda.
Izoh (0)