“Toshshahartransxizmat” aksiyadorlik kompaniyasi so‘nggi yillarda kuzatilayotgan Mercedes-Benz rusumidagi avtobuslarning yonib ketishi sabablarini ma’lum qildi, deb xabar bermoqda “Gazeta.uz.
Ma’lum qilinishicha, Mercedes-Benz avtobuslari yonishining asosiy sababi elektr uskunalari tizimi elektr simlaridagi qisqa tutashuvlardir.
“O‘zbekiston avtobuslardan foydalanish sharoitlari og‘ir bo‘lgan mintaqaga kiradi. Bu Toshkentda foydalanilayotgan avtobuslarning ishlab chiqaruvchisi – Germaniyaning Evo Bus GmbH kompaniyasi tomonidan ham tan olingan. Havoning kuchli darajada ifloslangani, yoz va qish mavsumlarida atrof-muhitdagi havo harorati keskin o‘zgarib turishi avtobuslarning tegishli uzel va agregatlariga salbiy ta’sir ko‘rsatadi va ularning ishonchliligini kamaytiradi”, – deyiladi “Toshshahartransxizmat” javobida.
“Bunday sharoitlarda Mercedes-Benz Conecto O345 avtobuslarining 10 yildan ortiq ishlashi elektr simlarining plastik izolyatsiyasining butunligi ishdan chiqishiga sabab bo‘ldi. Avtobuslarning harakat davri oshib borishi bilan ularda nosozliklar kelib chiqadi, mehnat sarfi oshadi, foydalanish ishonchliligi pasayadi. Shundan kelib chiqib, hozirgi vaqtda Mercedes-Benz Conecto O345 avtobuslari bosqichma-bosqich foydalanishdan chiqarilmoqda va 2015 yil oxiriga borib ushbu avtobuslardan foydalanish to‘liq to‘xtatiladi”, – dedi kompaniya vakillari.
Zamonaviyroq hisoblangan past polli Mercedes-Benz Conecto Low Floor avtobuslaridagi yong‘inlar ham foydalanishning iqlimiy xususiyatlari va avtobus konstruksiyasidagi kamchiliklar bilan bog‘liqligi qayd etildi.
“Toshshahartransxizmat” komissiyasi tomonidan avtobuslarning yonishi bilan bog‘liq har bir holat yuzasidan yong‘in sabablarini aniqlash bo‘yicha xizmat tekshiruvlari o‘tkazilmoqda. Tekshiruvlar yakunlari bo‘yicha kompaniyaning aybdor mansabdor shaxslarni zararlangan avtobusni o‘z hisobidan qoplab berish majburiyati bilan jazolash haqida buyrug‘i chiqarilmoqda.
Mercedes-Benz avtobuslarining yonishi bilan bog‘liq har bir holat yuzasidan Evo Bus GmbH’ga xatlar yo‘llangan, ular asosida kompaniya ekspertlari mustaqil tekshiruvlar o‘tkazgan. Konstruksiyadagi nosozliklar Mercedes-Benz Conecto Low Floor avtobuslarining 2012-yil (100ta) va 2013-yildagi(100ta) so‘nggi ikki partiyasini yetkazib berishda inobatga olingan.
Izoh (0)