Prezident Islom Karimov tashabbusi bilan Farg‘ona viloyati markazida bunyod etilgan San’at saroyi 6-dekabr kuni tantanali ravishda ochildi, deb xabar bermoqda O‘zbekiston Milliy axborot agentligi.
Farg‘ona shahrida bunyod etilgan San’at saroyi milliy va zamonaviy me’morlik an’analarini o‘zida uyg‘unlashtirgan. Eshik va ustunlari sharqona naqshlar bilan bezatilgan. Tomoshabinlar uchun barcha zarur sharoit va qulayliklar yaratilgan. Sahna atrofiga zamonaviy yoritish chiroqlari o‘rnatilgan. 40 gektar maydonda barpo etilgan so‘lim xiyobon, rangli chiroqlarda jilolanuvchi musiqali favvora saroyga yanada chiroy bag‘ishlab turibdi.
Ushbu san’at koshonasining ochilish marosimi haqiqiy bayram tusini oldi. Unda turli vazirlik, idoralar va jamoatchilik vakillari, san’at va madaniyat namoyandalari ishtirok etdi.
Prezident Islom Karimov farmoniga muvofiq Mustaqillikning 23 yillik bayrami arafasida O‘zbekistonning yuksak unvonlari, orden va medallari bilan taqdirlangan fuqarolarga ushbu mukofotlar topshirildi.
Marosimda san’at ustalari, yosh ijodkorlar ishtirokida konsert namoyish etildi.
Tadbirda O‘zbekiston Respublikasi Bosh vazirining o‘rinbosari A. Ikromov so‘zga chiqdi.
Izoh (0)