Rossiyaning “Moya planeta” telekanali rasmiy statistika va reytinglarga asoslangan holda Yer yuzidagi eng yomon shaharlar ro‘yxatini tuzib chiqdi.
Syudad-Xuares − jinoyatchilik bo‘yicha yetakchi
Meksikaning AQSh bilan chegarasi yaqinida joylashgan ushbu shaharda qotillik miqdori bo‘yicha dunyodagi eng yuqori ko‘rsatkich qayd etilgan: yiliga har 100 ming aholidan 120−170 kishisi jinoyatchilar qo‘lida halok bo‘ladi.
Singapur − eng qimmat shahar
The Economist jurnaliga qarashli Economist Intelligence Unit tomonidan tuzilgan eng qimmat shaharlar reytingida Singapur bu yil an’anaviy qimmat shaharlar − Parij va Londonni ortda qoldirdi. Kichik hududda ko‘p inshootlar va infratuzilmani joylashtirish zarurati borligi sababli singapurliklar deyarli hamma narsa uchun uch baravar qimmat to‘lashlariga to‘g‘ri keladi.
Agbogbloshi − eng ifloslantirilgan shahar
Ganadagi ushbu shahar AQSh, Yaponiya va Yevropadan keltiriladigan maishiy elektrotexnikaning eng katta axlatxonasi bilan tanilgan. Turli zararli moddalar miqdori bu shaharda me’yordan 100 marta ortiqligi aniqlangan.
Bog‘dod − yashash uchun eng yomon shahar
Mercur Human Resource kompaniyasi tomonidan turmush darajasi bo‘yicha tuzilgan reytingda Iroq poytaxti Bog‘dod shahri so‘nggi − 223-pog‘onani egallagan.
Dakka − aholi zichligi eng yuqori shahar
Bangladesh poytaxti Dakka shahrining aholisi 15 millionga yaqin bo‘lib, ichidan Gang va Braxmaputra daryolari va bir nechta kanallar oqib o‘tadi. Bir kvadrat kilometrga 44 ming kishi to‘g‘ri keladigan ushbu shahar aholi zichligi bo‘yicha dunyoda birinchi o‘rinda turadi. Sayohatchilar Dakkani yomon hidlar taraladigan va aholi ko‘payishiga bardosh berolmagan shahar sifatida ta’riflaydi.
Longyir − eng sovuq shahar
Norvegiyaning 2050 kishi yashaydigan Longyir shahri Yerning eng shimolida joylashgan shahar hisoblanadi. G‘arbiy Shpisbergan orolidagi ushbu shahardan Shimoliy Qutbgacha bo‘lgan masofa 1305 kilometrni tashkil etadi. Bu yerda o‘rtacha yillik harorat -6 darajaga teng.
Goma − eng xavfli shahar
Kongo Respublikasidagi 377 ming aholiga ega ushbu shaharni seysmologlar ikkinchi Pompey deb ataydi. Uning yonginasida joylashgan Afrikadagi eng xavfli Niragongo vulqoni 1882-yildan buyon 30 martadan ko‘proq otilgan. Har safar vulqondan otilgan lava diametri 2 kilometr, chuqurligi 250 metr bo‘lgan kraterni to‘ldiradi va istalgan soniyada qirg‘oqdan oshib chiqishi mumkin. Natijada har safar minglab uylar vayron bo‘ladi.
Moskva − sayohat uchun eng yomon shahar
Moskva shahri TripAdvisor portali tomonidan tuzilgan sayyohlik yo‘nalishlari reytingida oxirgi o‘rinni egallagan. Rossiya poytaxti biryo‘la besh yo‘nalish − “Xushmuomala hamshaharlar”, “Do‘stona taksichilar”, “Eng yaxshi taksi xizmatlari”, “Eng yaxshi sifat − narx mutanosibligi” va “Eng yaxshi mehmonxonalar” bo‘yicha oxirgi bo‘lgan. Shuningdek, Moskva haydovchilarga eng ko‘p muammo tug‘diruvchi shaharlar reytingida birinchi o‘rinda ko‘rsatilgan.
Izoh (0)