O‘zbekistonda yangi ochiladigan UMS aloqa operatori www.umsuz.uz va www.myums.uz domenlarini ro‘yxatdan o‘tkazdi, yangi operatorning saytlari aynan shu domenlarda joylashishi mumkin, deya xabar bermoqda RedPen.
www.mts.uz domeni esa haligacha “Uzdunrobita” ChEKga tegishli bo‘lib turibdi, uni UMS ishlatish-ishlatmasligi hozircha noma’lum.
“Domen nomlari bilan bog‘liq bu vaziyatda Toshkentdagi UMS (“Uyut Mebel Servis” MChJ) mebel fabrikasining omadi chopib qoldi”, — deb yozadi nashr. Gap shundaki, www.ums.uz domeni aynan shu korxonaga tegishli bo‘lib, UMS aloqa operatori ochilishi haqida xabarlar paydo bo‘lganidan beri odamlar adashib shu saytga kira boshladi. Natijada sayt ko‘rsatkichlari deyarli to‘rt marta o‘sib ketdi.
Eslatib o‘tamiz, Rossiyaning “MTS” mobil aloqa operatori O‘zbekistonda mamlakat hukumati bilan tuzilgan Universal Mobile Systems qo‘shma korxonasi doirasida 1-dekabrda aloqa tarmog‘ini ishga tushiradi. O‘tgan hafta Universal Mobile Systems MChJ qo‘shma korxonasi direktori etib avval “MTS” kompaniyasining Rossiyaning Oltoy o‘lkasidagi filialiga rahbarlik qilgan Dmitriy Nagorniy tayinlangani ma’lum bo‘ldi.
Izoh (0)