Farg‘ona viloyati ma’muriy markazida qurilish-obodonlashtirish ishlari izchil olib borilmoqda, deya xabar bermoqda “Kun” “Turkiston-press” axborot agentligiga tayanib.
Ma’lum qilinishicha, Farg‘ona shahri markaziy ko‘chalari bo‘ylab 11,4 ming tupga yaqin manzarali daraxtlar ekilgan.
Xususan, Mustaqillik va Ahmad Farg‘oniy ko‘chalarida kashtan daraxtlari galereyasi, yapon soforalari va boshqa manzarali o‘simliklar ansamblini ko‘rish mumkin.
Eski yog‘-moy kombinati o‘rnida qad rostlagan ming o‘rinli san’at saroyi hududida, shuningdek, Oqariq-Navoiy chorrahasida, Quvasoy, O‘zbekiston ko‘chalarida yangi favvoralar barpo etilgan.
Ahmad Farg‘oniy nomidagi istirohat bog‘ida Qo‘g‘irchoq teatri binosi foydalanishga topshirilgan bo‘lsa, Harbiylar shaharchasida ko‘p qavatli 34 ta turarjoy binosi qurib bitkazildi.
Shaharda 27 kilometrga ichimlik suvi, 15 kilometrga elektr, 18 kilometrga gaz tarmoqlari yangidan tortildi, 110 ta transformator kapital ta’mirlandi.
Bir so‘z bilan aytganda, 40 mingdan ortiq aholining ichimlik suvi, issiqlik manbai, elektrga bo‘lgan ehtiyoji to‘liq qondirildi, deyiladi “Turkiston-press” xabarida.
Izoh (0)