Rossiya Federatsiyasi Prezidenti Vladimir Putin bolalar uchun mo‘ljallangan “Spokoynoy nochi, malishi!” (“Xayrli tun, bolalar!”) ko‘rsatuvining yangi qahramonini o‘ylab topdi. Yangi qahramon teleekranlarda oktabr oyida paydo bo‘lishi kutilmoqda. Bu haqda “RIA Novosti” xabar berdi.
“Anchadan beri ko‘rsatuv uchun yangi qo‘g‘irchoq-qahramon izlayotgan edik. Biz juda ko‘p variantlarni ko‘rib chiqdik. Biroq, rostini aytsam, yangi qahramon g‘oyasi prezident tomonidan ilgari surildi. Avvaliga bu kutilmagan taklif haqida o‘ylab qoldik, birozdan so‘ng, uning mo‘ljalga aniq tekkanini tushunib yetdik”, — deydi “Klass!” telekompaniyasi direktorlar kengashi rahbari Aleksandr Mitroshenkov.
Mitroshenkov, shuningdek, yangi qahramon 3D formatda — haqiqiy kompyuter qahramoni bo‘lishini, tabassum qilish, qo‘l berib ko‘rishish va gaplasha olish qobiliyatlariga ega bo‘lishini aytib o‘tdi. Bir kadrda boshlovchi, qo‘g‘irchoq-qahramonlar va animatsiyani birlashtirish o‘ziga xos loyiha bo‘lib, unda, 3D-qahramondan tashqari, uning haqiqiy “tirik” akasi ham ishtirok etadi.
“Ikki haftadan so‘ng hamma yangi qahramon kimligini bilib oladi va, o‘ylashimcha, ko‘pchilik prezidentning bu voqeaga qanday aloqasi borligini tushunib yetadi”, — deb ta’kidladi Mitroshenkov.
Izoh (0)