InfoCom-2014 axborot-kommunikatsiya texnologiyalari haftaligi 22—26-sentabr kunlari bo‘lib o‘tadi. InfoCom-2014 doirasida o‘tkaziladigan tadbirlarda 20 dan ziyod mamlakatdan axborot-kommunikatsiya texnologiyalari sohasi ishlab chiqaruvchilari, kompaniya va ekspertlarning ishtirok etishi kutilmoqda.
Haftalik doirasida 22-sentabr kuni “Yoshlar ijod saroyi”da bo‘lib o‘tadigan Bestsoft Uzbekistan-2014 ko‘rgazmasida 40 dan ortiq kompaniyalar o‘z mahsulotlari bilan ishtirok etishi kutilmoqda. Ko‘rgazma 450 kvadrat metr maydonni qamrab olishi ko‘zda tutilgan. “Ishlanmalarni tayyorlash vositalari”, “Loyihalarni amalga oshirish”, “Ta’lim”, “Axborot xavfsizligi”, “Multimedia va dizayn” mavzulari ko‘rgazmaning asosiy yo‘nalishlari hisoblanadi.
Milliy Uz domeni-2014 internet festivali 15-iyuldan 22-sentabrgacha davom etishini ma’lum qilgan edik. Festival natijalari va g‘oliblarni taqdirlashga bag‘ishlangan tadbir 22-sentabr kuni “Yoshlar ijod saroyi”da tashkil etiladi. Festival g‘oliblari 10 ta mavzuli va 2 ta maxsus yo‘nalishlar bo‘yicha saralab olinadi.
Bu yil Axborot-kommunikatsiya texnologiyalari bo‘yicha sammit (AKT Sammit-2014)da ishtirok etuvchi mutaxassis va ekspertlar soni 500 nafarga yetdi. Sammit quyidagi uch muhim yo‘nalishlarda tashkil etiladi: “Davlat sektorida AKTdan foydalanish”, “Tadbirkorlikda AKTdan foydalanish”, “Internet va axborot resurslari”. Sammit yakunida mavzu va yo‘nalishlar bo‘yicha takliflar va Sammit qarori qabul qilinadi. AKT Sammit-2014 23-sentabr kuni Xalqaro hamkorlik markazida tashkil etiladi.
Shuningdek, 23-sentabr kuni “Turkiston” saroyida yoshlar o‘rtasida o‘tkazilgan MIT.UZ milliy internet tanlovi g‘oliblarini taqdirlash marosimi bo‘lib o‘tadi. Joriy yilda tanlov 10 ta asosiy hamda 4 ta qo‘shimcha yo‘nalishlar bo‘yicha tashkil qilinmoqda. Unda 14 yoshdan 30 yoshgacha bo‘lgan O‘zbekiston fuqarolari ishtirok etishlari mumkin. Tanlovga taqdim etilgan ishlar nafaqat hakamlar, balki internet foydalanuvchilari tomonidan ham baholanadi.
InfoCom-2014 AKT haftaligi doirasida 24—26-sentabr kunlari Toshkent, Urganch va Guliston shaharlarida bir vaqtning o‘zida an’anaviy ICTExpo-2014 milliy axborot texnologiyalari ko‘rgazmasi ham bo‘lib o‘tadi. Ko‘rgazma bir qator xilma-xil loyihalar, seminar va davra suhbatlari, shu bilan birgalikda, turli aksiya va tanlovlarni o‘z ichiga olgan. Uch kun davom etadigan ko‘rgazmaga 35 ming nafar kishi kelishi kutilmoqda. ICTExpo-2014 ko‘rgazmasi AKT sohasida o‘zaro hamkorlik o‘rnatish va mustahkam tijorat aloqalarini bog‘lashda yangi imkoniyat bo‘lib xizmat qiladi. Ko‘rgazma nihoyasida tashkiliy qo‘mita tomonidan stend va bo‘limlari eng yaxshi deb topilgan g‘oliblar mukofotlanadi.
24-sentabr kuni soat 15:00 da “Ko‘rgazma savdo markazi” kompleksida O‘zbekistonda internet provayding va milliy kontentning rivojiga bag‘ishlangan davra suhbati bo‘lib o‘tadi.
26-sentabr kuni “Poytaxt” biznes-markazida “‘Elektron hukumat’ hukumat platformasida axborot vositalari rivojlanishini qonuniy tartibga solish” mavzuidagi xalqaro seminar bo‘lib o‘tadi. Seminar yakunida ishlab chiqilayotgan qonun loyihalari, “elektron hukumat” tizimini joriy qilish doirasida ishlab chiqilayotgan axborot tizimlari va ma’lumotlar bazalari kompleksi infratuzilmasi va integratsiyasiga qo‘yiladigan talablarga doir takliflar ko‘rib chiqilishi belgilangan.
Kompyuter o‘yinlari bo‘yicha O‘zbekiston milliy chempionatning yakuniy bosqichi 29-sentabr kuni bo‘lib o‘tadi. Mazkur final g‘oliblari WCG-2014 jahon chempionatida ishtirok etish huquqini qo‘lga kiritadi.
Eslatib o‘tamiz, Uzbekistan CyberGames-2014 kompyuter o‘yinlari bo‘yicha O‘zbekiston milliy chempionatiga joriy yilning 16—17-avgust kunlari Buxoroda start berilgan edi. O‘zbekiston chempionatining navbatdagi turniri Samarqandda 23—24-avgust kunlari o‘tkazildi.
FIFA14 bo‘yicha O‘zbekiston chempioni esa Fransiyada bo‘lib o‘tadigan ESWC2014 jahon kubogi finalida qatnashish huquqiga ega bo‘ladi.
Izoh (0)