23—24-avgust kunlari Samarqandda Zo‘r-Zo‘r UCG 2014 e-sporti bo‘yicha O‘zbekiston Chempionatining hududiy saralash turniri bo‘lib o‘tdi. Unda 120 dan ortiq geymerlar ishtirok etdi. DotA Allstars va FIFA14 o‘yinlarining turnir natijalari bo‘yicha ushbu hududdan milliy final ishtirokchilari aniqlandi. Bu haqda InfoCom.uz xabar berdi.
DotA Allstars guruh o‘yini bo‘yicha Samarqanddagi hududiy saralash turnirida Jafar Rustamov, Shoolim Shorahmedov, Bekzod Botirov, Abduvali Ahmedov va Rustam Qosimovlar ishtirokidagi Lux (N.K.S.) guruhi birinchi o‘rinni egalladi. G‘oliblar 20-sentabr kuni Toshkent shahrida bo‘lib o‘tadigan milliy finalga yo‘llanma oldi.
24-avgust kuni Samarqand shahrida Zo‘r-Zo‘r UCG 2014 e-sporti bo‘yicha O‘zbekiston Chempionati hududiy saralash bosqichi doirasida FIFA14 o‘yini bo‘yicha turnir bo‘lib o‘tdi. Birinchi o‘rin va 26-sentabr kuni Toshkentdagi ICTExpo — 2014 Xalqaro ko‘rgazmasining bosh sahnasida bo‘lib o‘tadigan milliy finalga yo‘llanmani samarqandlik Dilshod Abdurahmanov qo‘lga kiritdi.
Eslatib o‘tamiz, bundan avvalgi e-sport bo‘yicha Zo‘r-Zo‘r UCG 2014 O‘zbekiston chempionatining mintaqaviy saralash turnirlari 16—17-avgust kunlari Buxoroda bo‘lib o‘tgan edi.
Izoh (0)