AQShning Missuri shtati Fergyuson shahrida politsiya tomonidan qora tanli o‘smirning otib o‘ldirilishi mamlakatdagi 90 ta shaharda payshanba va juma kunlari e’tiroz namoyishlari o‘tkazilishiga olib keldi. Bu haqda Associated Press agentligiga asoslanib, “RIA Novosti” xabar bermoqda.
Politsiyachilar 10-avgust kuni 18 yashar qora tanli o‘smir — Maykl Braunni Fergyuson shahrida otib o‘ldirdi. Ushbu voqeadan so‘ng shaharda bir necha kun mobaynida tartibsizliklar kuzatildi. Politsiya xodimlari olomonni tarqatish uchun ko‘zni yoshlantiruvchi gaz va rezina o‘qlardan foydalandi. Natijada shahar aholisining bir qanchasi jarohatlandi.
Payshanba kuni kechqurun Fergyuson shahri markaziga qurbonlar xotirasiga bag‘ishlab yongan shamlarni ushlagan yuzlab odam to‘plandi.
Baltimor aholisi shahar politsiyasi bosh boshqarmasi ostonasida sodir bo‘lgan voqeaga nisbatan o‘zining nafratini bildirdi. Bir necha ming aholi Nyu-York ko‘chalariga ham e’tiroz bilan chiqdi. Namoyish qatnashchilari markaziy ko‘chalardan qo‘llarini yuqoriga ko‘targan holda “Qo‘llar tepaga! Otmang!” degan so‘zlar bilan baqirib o‘tdi.
Los-Anjeles, San-Diyego, Atlanta, Sietl, Mayami, Filadelfiya va Vashingtonda ham shunga o‘xshash norozilik aksiyalari bo‘lib o‘tdi.
Sodir bo‘lgan voqealar va ularga politsiyaning aralashgan-aralashmaganligi haqida ma’lumot berilmadi. Avvalroq, federal politsiya talablarni bajarmagan aksiya ishtirokchilarini hibsga olishini ma’lum qilgan edi.
Izoh (0)