Bugun, 15-iyul kuni Toshkent shahridagi Aloqa tarixi muzeyida matbuot anjumani o‘tkazilib, unda Milliy UZ domeni internet-festivalining boshlangani haqida e’lon qilindi.
Matbuot anjumanida festival qay tarzda olib borilishi haqida ma’lumot berildi. Tanlovda festival o‘tkazilishi mobaynida amal qilgan va UZ domenida ro‘yxatdan o‘tgan saytlar ishtirok etishi ta’kidlandi.
Ishtirok etishni xohlovchilar www.if.uz saytida ro‘yxatdan o‘tish orqali ariza taqdim etishi mumkin. Arizalar 2014-yil 15-iyuldan 1-sentabrga qadar qabul qilinadi.
Festival 15-iyuldan 22-sentabrgacha davom etadi. Bu yilgi tanlov dasturi 10 ta mavzuli va 2 ta maxsus nominatsiyani o‘z ichiga oladi. Belgilangan muddatda internet-festivalning ishtirokchilari orasida har bir mavzuli nominatsiya bo‘yicha eng ko‘p xost to‘plagan 10 ta sayt g‘olib bo‘ladi. Har bir nominatsiya uchun uch nafar ishtirokchiga o‘rin berilib, maxsus diplom va sovrinlar bilan taqdirlanadi. Shuningdek, festivalning besh nafar sovrindoriga faxriy laureat Diplomi beriladi.
Tanlovda ishtirok etayotgan saytlarni internet-texnologiyalar, san’at, madaniyat, davlat boshqaruvi va boshqa sohalarning yetakchi mutaxassislaridan iborat hakamlar hay’ati baholaydi. Yakuniy natijalar InfoCOM 2014 Axborot texnologiyalar haftaligining birinchi kuni — 22-sentabrda Toshkent shahridagi Yoshlar ijod saroyida e’lon qilinadi.
Anjumanda, shuningdek, festival doirasida O‘zbekistonda ishlab chiqilgan mobil dasturlar tanlovi ham o‘tkazilishi rejalashtirilgani qayd etildi.
Ma’lumot uchun, internet-festival O‘zbekistonda 2001-yildan buyon o‘tkazib kelinmoqda. Uning asosiy maqsad va vazifalari aholi o‘rtasida internet tarmog’ini ommalashtirish, unda milliy kontentni rivojlantirishga yordam ko‘rsatish va internet tarmog‘ida o‘zbek tili qo‘llanilishi doirasini kengaytirishdan iborat.
Izoh (0)