Suriyaning amaldagi prezidenti Bashar Asad davlat rahbarligiga saylovlarda katta ustunlik bilan g‘alaba qozondi. Endi u yana yetti yil mamlakatni boshqaradi. Bu haqda Associated Press xabar berdi.
4-iyun kuni kechqurun parlament spikeri ovoz berishning yakuniy natijalarini e’lon qildi. Unga ko‘ra, Asadga saylovchilarning 88,7 foizi ovoz bergan, bu 10,3 million kishi demakdir. Uning raqiblari — Hassan Abdul Illohi an-Nuriy va Mohir Abdul Hafiz Hojar 4,3 va 3,2 foiz ovoz to‘pladi. Oliy konstitutsiyaviy sudning ma’lum qilishicha, ovoz berishda saylovchilarning 73,42 foizi ishtirok etgan.
Damashq aholisi ushbu yangilikni olqishlar va havoga o‘q otishlar bilan kutib oldi. Asadning minglab tarafdorlari uning fotosuratlari va milliy bayroqlar bilan poytaxt ko‘chalarini to‘ldirib saylov natijalarini qutladi.
Agence France-Presse xabar berishicha, bayramona o‘q uzishlar natijasida Damashqda kamida uch kishi halok bo‘lgan, yana o‘nlab kishilar yaralangan. Mamlakat shimolidagi Xaleb shahrida esa 20 kishi jarohat olgan.
Suriyada o‘tkazilgan saylov mamlakat eng yangi tarixida alternativ asosdagi birinchisi bo‘ldi. Saylovlar hukumat tomonidan nazorat o‘rnatilgan hududlarda bo‘lib o‘tdi. Mamlakatning shimoli va sharqida hamon fuqarolar urushi davom etmoqda.
Izoh (0)