Rossiyaning G‘arbiy Ural mashinasozlik konserni (G‘UMK) prezidenti Aleksandr Pozdeyev O‘zbekistonda hibsga olindi. Bu haqda “RIA Novosti” tarqatgan xabarga asoslanib, Gazeta.uz ma’lum qildi.
Jinoyat ishi G‘UMK tomonidan amalga oshirilgan shartnomalar narxini oshirganlik bo‘yicha qo‘zg‘atilgan. Ayni paytda G‘UMK O‘zbekistonda umumiy qiymati 200 million dollarga teng loyihalarni amalga oshirmoqda.
Pozdeyev kaliy zavodi bo‘yicha jinoiy ish yuzasidan O‘zbekiston Bosh prokuraturasiga tergovga chaqirilgan, shundan so‘ng hibsga olingan.
Rossiya Federatsiyasining O‘zbekistondagi elchixonasi O‘zbekiston Tashqi ishlar vazirligi bilan G‘UMK prezidentini hibsga olish bo‘yicha masalar yechimida aloqada bo‘lib turibdi.
Bugun kunning ikkinchi yarmida mahalliy sud tomonidan Pozdeyevni hibsga olish apellyatsiyasi ko‘rib chiqiladi.
2010-yil sentabrida G‘UMK Qashqadaryo viloyatidagi Dehqonobod kaliy o‘g‘itlari zavodi uchun xomashyo qazib chiqarish majmuasini qurib bergan. Uning yillik quvvati 1 million tonna rudaga teng bo‘lib, loyiha qiymati 60 million dollarni tashkil etgan.
2015-yil boshigacha kompaniya ushbu zavod uchun uzunligi 30 kilometrli yuk tashuvchi dor yo‘lini qurib bitkazishni rejalashtirgan edi.
Izoh (0)