Denis Istomin bugun, 19-may kuni Germaniyaning Dyusseldorf shahrida start oladigan turnirda qatnashadi. Bu haqda “Olamsport” xabar berdi.
Dyusseldorf turnirining mukofot jamg‘armasi 485 ming 760 yevroni tashkil etadi. G‘olib tennischi 77 ming 315 yevro hamda 250 reyting ochkosiga ega bo‘ladi.
O‘zbekistonning birinchi raqamli tennischisi Germaniyadagi turnirning ilk davrasida musobaqaning oltinchi raketkasi, finlyandiyalik Yarkko Niyeminenga qarshi kortga chiqadi. Yarkko dunyo reytingida 51, Istomin esa 55-o‘rinni egallab turibdi.
Agar Denis Niyeminen to‘sig‘idan muvaffaqiyatli o‘tsa, ikkinchi davrada saralash bahslarida g‘alaba qozongan ikki tennischi bilan to‘qnash keladi. Bu turnirning birinchi raqamli tennischisi germaniyalik Filipp Kolshrayberdir.
Eslatib o‘tamiz, Denis Filipp Kolshrayberni Myunxen turnirida 2 soatu 4 daqiqa davom etgan uchrashuvda 7:5, 2:6, 6:4 hisobida mag‘lubiyatga uchratgan edi.
Izoh (0)