16-may kuni Toshkentda Markaziy Osiyo mamlakatlari bilan aloqa va o‘zaro hamkorlik bo‘yicha NATO xodimi byurosi rasman ochiladi. Bu haqda gazeta.uz xabar berdi.
Ochilish marosimida NATOning Kavkaz va Markaziy Osiyo (MO) bo‘yicha bosh kotibi maxsus vakili Jeyms Appaturay, O‘zbekistondagi NATOga a’zo mamlakatlar elchilari, MO davlatlari elchilari, shuningdek O‘zbekiston Tashqi ishlar vazirligi va boshqa davlat organlari rahbariyati ishtirok etadi.
Markaziy Osiyo mamlakatlari bilan aloqa va o‘zaro hamkorlik bo‘yicha NATO xodimi kichik shtat bilan birga NATOning joylardagi diplomatik vakili vazifasini bajaradi. Bundan tashqari, mudofaa rejasi va tahlili, NATO operatsiyalariga yordam berish, harbiy ta’lim va tayyorgarlik, ilmiy va ekologik masalalar bo‘yicha hamkorlik, jamoatchilik diplomatiyasi kabi sohalarda NATOning Markaziy Osiyodagi sheriklar bilan amaliy hamkorligiga ko‘mak beradi.
2004-yil iyunda Istanbuldagi Sammitda NATO mamlakatlari Kavkaz va MO bo‘yicha maxsus vakil tayinlashga qaror qilgan edi. Unga har bir hudud uchun bittadan — ikki nafar xodim aloqa va o‘zaro hamkorlik bo‘yicha yordam beradi.
NATOning Markaziy Osiyodagi vakolatxonasini Toshkentda ochish masalasi 2011-yilda O‘zbekiston Prezidenti Islom Karimovning Bryusselga tashrifi va NATO bosh kotibi Anders Fog Rasmussen bilan uchrashuvi chog‘ida muhokama qilingan edi.
Qozog‘iston NATOning aloqa va o‘zaro hamkorlik bo‘yicha xodimini qabul qilgan Markaziy Osiyodagi ilk sherik bo‘ldi. 2013-yil martidan NATO xodimi O‘zbekistonda ish boshladi, uning ofisi 2013-yil iyulida diplomatik vakolatxona sifatida akkredidatsiyadan o‘tgan.
Izoh (0)