Urganch shahrida UzXCMG O‘zbekiston—Xitoy qo‘shma korxonasi ish boshladi, deb xabar berdi O‘zA.
UzXCMG qo‘shma korxonasi “O‘zbekiston temir yo‘llari” davlat aksiyadorlik kompaniyasi tarkibida Xitoyning Xuzhou Construction Machinery Group korporatsiyasi bilan hamkorlikda tashkil etildi.
Qo‘shma korxonada gidravlik ekskavatorlar va boshqa qurilish uskunalari ishlab chiqariladi, texnikalarga xizmat ko‘rsatiladi.
— Korporatsiyamiz 100 turdan ortiq qurilish, melioratsiya va tog‘ texnikalari ishlab chiqaruvchi dunyodagi yirik kompaniyalardan biridir, — deydi Xuzhou Construction Machinery Group korporatsiyasining texnik masalalar bo‘yicha maslahatchisi Yang Venjiye. — Kompaniyamiz AQSh, Germaniya va Yaponiyaning Katerpiler, Libxerr, Tissen Grupp va Kavasaki kabi yirik kompaniyalari bilan hamkorlik o‘rnatgan.
Loyiha doirasida 15 million dollarlik investitsiya mablag‘i o‘zlashtirilishi belgilangan. Korxona tizimidagi muhandislik tarmoqlari tubdan ta’mirlandi, oqova suv inshootlari yangidan o‘rnatilib, hududdagi temir yo‘llar yangilandi, yuk ko‘tarish moslamalari kapital ta’mirdan chiqarildi.
— UzXCMG qo‘shma korxonasida mahsulot ishlab chiqarishni tashkil etish bosqichma-bosqich amalga oshiriladi, – deydi sex boshlig‘i Anvar Nuriyev. — Birinchi bosqichda alohida yirik mexanizmlar yig‘ilib, ba’zi payvandlanuvchi konstruksiyalar va ehtiyot qismlar tayyorlanadi. Ishchilarning aksariyatini kasb-hunar kolleji bitiruvchilari tashkil etadi. Yaqinda ularning bir guruhi Xitoyda bo‘lib, XCMG korporatsiyasining ekskavator ishlab chiqaradigan zavodida malaka va tajriba oshirib qaytdi.
Korxona to‘liq quvvat bilan faoliyat yurita boshlagach, 400 nafardan ziyod yosh doimiy ish o‘rni bilan ta’minlanadi.
Izoh (0)