Xalq ta’limi vazirligi tomonidan umumta’lim maktabi o‘quvchilari o‘rtasida ilk bor “Ingliz tili bilimdonlari” ko‘rik-tanlovi tashkil etildi. Bu haqda O‘zA xabar berdi.
– Mazkur ko‘rik-tanlov mamlakatimizda ta’lim-tarbiya, xususan, chet tillarini o‘qitish tizimida olib borilayotgan islohotlar istiqbolidan yorqin dalolatdir, – deydi Xalq ta’limi vazirligi ta’lim muassasalari faoliyatini tashkil etish bosh boshqarmasi boshlig‘i Fayzulla Ahmedov. – Tanlovning turli bosqichlarida 5—9-sinf o‘quvchilari barcha shartlar bo‘yicha puxta bilimga ega ekanini namoyish etdi.
Abdulla Avloniy nomidagi xalq ta’limi xodimlarini qayta tayyorlash va malakasini oshirish markaziy institutida o‘tkazilgan ko‘rik-tanlovning mamlakat bosqichida o‘z hududida g‘oliblikni qo‘lga kiritgan 14 jamoa o‘zaro bahslashdi.
Uch turdan iborat tanlov davomida o‘quvchilarning ingliz tiliga doir bilimlari sinovdan o‘tkazildi. Jumladan, 5—6-sinf o‘quvchilari test savollariga javob bergan bo‘lsa, 7—9-sinf o‘quvchilari tanlangan mavzu bo‘yicha ijodiy yozma ish topshirdi.
Og‘zaki savol-javob tarzida o‘tgan ikkinchi turda 5-sinf o‘quvchilari geografiyaga oid bilimlarini ingliz tilida ifodalashdi. 6-sinf o‘quvchilariga muayyan rasm mazmunini, 7-sinf o‘quvchilariga tarixga doir bilimlarini so‘zlab berish talabi qo‘yildi. 8-sinf o‘quvchilari ingliz tilidagi audiomatnni tinglab tushunish va gapirish mahoratini namoyon etgan bo‘lsa, 9-sinf o‘quvchilari videotasvirni sharhlab berdi.
Sahna ko‘rinishi shartida ishtirokchilarning jamoaviy uyushqoqligi, ingliz tilida ravon so‘zlasha olish va rol ijro etish mahoratiga baho berildi.
Qizg‘in va murosasiz kechgan tanlov yakunida umumiy ballar hisobiga ko‘ra Toshkent shahri jamoasi birinchi, Farg‘ona viloyati vakillari ikkinchi, Buxoro viloyati jamoasi uchinchi o‘rinni egalladi. Qolgan ishtirokchilar ham maxsus diplom va sovg‘alar bilan rag‘batlantirildi.
– Ingliz tili bilimdonlari sifatida e’tirof etilganimizdan juda xursandman, – deydi Yunusobod tumanidagi 17-umumta’lim maktabining 8-sinf o‘quvchisi Zilola Hoshimova. – Men bu tanlovda ishtirok etgan har bir o‘quvchini g‘olib deb atagan bo‘lardim. Chunki marraga yetib kelganlar, avvalo, o‘z viloyatining bilimdonlari, qolaversa, ushbu bellashuvlarda to‘plangan tajriba, oshirilgan bilim kelajakda, albatta, o‘z mevasini berishiga ishonaman.
Izoh (0)