7-aprel kuni Toshkentdagi Gimnastika saroyida o‘smirlar o‘rtasida XIII Osiyo chempionati bahslari boshlanadi. Mazkur qit’a chempionatida 2014-yil Xitoyning Nankin shahrida o‘tkaziladigan II o‘smirlar Olimpiada o‘yinlarining yo‘llanmalari ham o‘ynaladi. Bu haqda O‘zbekiston Milliy Olimpiya qo‘mitasi matbuot xizmati xabar berdi.
Ta’kidlash joiz, sportning ushbu turi bo‘yicha bu darajadagi yirik musobaqa O‘zbekistonda ilk bor o‘tkazilmoqda. Osiyo chempionatini yurtimizda o‘tkazilishi 2012-yil Qatar davlatida bo‘lib o‘tgan Osiyo gimnastika federatsiyasining ijroqo‘m yig‘ilishida e’lon qilingan.
O‘zbekiston gimnastika federatsiyasidan ma’lum qilinishicha, 7—14-aprel kunlari poytaxtimizda o‘tkaziladigan Osiyo chempionatida 22 davlatdan 120 nafardan ortiq sportchi 13 ta medallar jamlanmasi uchun kurash olib boradi. Ular orasidan 10 nafar (5 nafari o‘smir-qizlar) o‘zbekistonlik sportchi o‘rin egallagan.
O‘smirlar Olimpiada o‘yinlariga o‘g‘il bolalar o‘rtasida 10 ta, qizlar orasida esa 9 ta litsenziya o‘ynaladi. Har bir davlat ko‘pi bilan ikkitadan yo‘llanmani qo‘lga kiritishi mumkin.
Izoh (0)